سهير رمزي عن مشاهدها الجريئة: "دي تاريخي الفني ومش هحذفها من يوتيوب"

حلت الفنانة سهير رمزي ضيفة في برنامج "حبر سري" الذي تقدمه الإعلامية أسما إبراهيم، على قناة القاهرة والناس.

وكشفت سهير رمزي، أنها لو عاد بها الزمن لن تقدم المشاهد الجريئة التي ظهرت بها في شبابها.

وقالت سهير رمزي، أنها كانت مقتنعة في شبابها بتلك المشاهد وتراها جزءًا من عملها.

وتابعت عن هجوم الجمهور حاليا على الممثلة التي تقدم مشاهد جريئة: "ده اللي عملته السوشيال ميديا، لأن في ناس بيطلعوا يقولوا أراء ومحدش بيقول لهم لأ".

سهير رمزي: زمان كنا بننزل بلبس قصير ومفتوح ومحدش بيبص

واستكملت حديثها قائلة: "زمان كنا بننزل بلبس قصير ومفتوح ومحدش بيبص لنا، لكن دلوقتي لأ، كل ده من السوشيال ميديا، وافتكروا قبلها إحنا كنا فين ودلوقتي بقينا فين، النهاردة العيلة لما تقعد مع بعض محدش بيكلم التاني، أنا ببقى ماسكة موبايل وجوزي ماسك موبايل، نتكلم كلمتين ونرجع للموبايل".

وأكدت إنزعاجها من عثورها على فيديوهات مشاهدها الجريئة على الإنترنت، موضحة: "أنت بتستفيد إيه لما تكتب كده أو تقول ده دلوقتي، وبعدين دي حدوتة الفيلم، أنا كنت جريئة في بعض المشاهد شوية، إنما في سياق الموضوع، مش هبقى قاعدة في الصالون لابسة مايوه، المايوه يتلبس على البحر، ده اللي كنت بعمله وكل البنات بتعمله".

سهير رمزي عن مشاهدها الجريئة: “ده تاريخي اللي عملته وملزمة بيه”

وأشارت سهير رمزي إلى أنها لا تحب حذف فيديوهات مشاهدها الجريئة من الإنترنت لو امتلكت القدرة على ذلك، وأوضحت: "ده تاريخ أنا عملته وملزمة به، في بعض الأفلام عموما محبهاش، لأن ممكن يبقى فيلم هايف ميقولش رسالة كويسة، عملته للانتشار وكنت وقتها عايزة أعمل اسم لنفسي، لكن أمحي تاريخي وأشيل أفلامي لأ".