دينا: "ابني كان عنده ADHD والحمد لله بقى كويس"

حلت دينا ضيفةً على الإعلامية لميس الحديدي بحلقة الأمس الأحد، 12 فبراير، من برنامج كلمة أخيرة المذاع عبر فضائية ON.

وخلال الحوار كشفت الفنانة والراقصة دينا عن أنها "ست بيت وطباخة شاطرة جدًا"، وكذلك عن علاقتها بنجلها علي، كاشفةً أنه حاليًا يدرس الطبخ في فرنسا.

وفي السطور التالية، نرصد أبرز تصريحات دينا.

ماجبش طباخ في البيت ومابحبش أكل حد غير نفسي

وقالت دينا: "ست بيت وبوفر وكل حاجة بس مش بخل، أولًا أنا طباخة شاطرة جدًا مابجبش طباخ في البيت، أنا مابحبش أكل حد غير نفسي، يعني أنا اللي بأكل نفسي دلوقتي، لأن معنديش حد في البيت، أنا اللي بأكل نفسي".

عايزة علي يدرس أحسن ويعيش في حياة صحية أكتر

وأردفت دينا: "علي مسافر كان في المدرسة في أمريكا، دلوقتي في الجامعة في باريس، عايزاه يدرس أحسن ويعيش في حياة صحية أكتر، دلوقتي بقى فاهم يعني إيه فن، وفاهم يعني إيه ماما ويعني إيه رقص، وفاهم يعني إيه كل حاجة خلاص".

علي قال إني مثله الأعلى وياريت ينجح ويبقى زيي

وعمّا إذا كانت تضايق علي فكرة أن دينا راقصة، أوضحت: "مابيزعلش من فكرة ماما بترقص، ده طلع في برنامج ما جم في البيت خدوا منه كلمتين، قالهم هي مثلي الأعلى ياريت أنجح وأبقى زيها، يعني بيتغير فخور بيّ طبعًا، هو كل حياتي وهو نسخة مني، بنفس طريقة الكلام بنفس التصرفات بكل حاجة بشقاوته، أنا كنت شقية وأنا صغيرة كده".

دينا تكشف سبب دخول علي local school في أمريكا

وكشفت دينا عن سبب دخول علي local school في أمريكا، قائلةً: "دخل المدرسة هنا قعد أربع سنين وبعدين كمل في أمريكا، ماكنش فيه سخافات المدرسة بس هو كان عنده ADHD، والمدرسة هنا قالت لي عايزين نحط له shadow teacher، ماما قالت لي ولا shadow teacher ولا حاجة، هو يدخل local school في أمريكا أحسن له، وهناك بيتعاملوا معاهم والحمد لله بقى كويس، دلوقتي في الجامعة في فرنسا".

بجد الجيل الجديد بيختار حاجات very creative

وبخصوص تفضيلها لاستكمال علي لدراسته في الخارج أم العودة إلى مصر، قالت دينا: "أنا بفضل يرجع، هيطلع طباخ، بيدرس طبخ طبخ، بجد ربنا يوفقه بجد الجيل الجديد بيختار حاجات very creative، وحاجات همّ بيحبوها، هو في الـfrench والـjapanese والـitalian طبعًا هو أحسن مني".

في المصري بيرجع لي على طول

وأتمت دينا، كاشفةً أن علي يعود لها في وصفات الأكلات المصرية، حيث قالت: "هو في المصري مثلًا يرجع لي على طول لسه مكلمني، قال لي ماما هي الكبدة بتتعمل إزاي عندكم اللي بالفلفل دي؟، فديت له الوصفة، لكن مثلًا الصوصات هو بيخترع صوصات".

لمشاهدة الفيديو اضغط هنا

أحدث أعمال دينا

يذكر أن الفنانة دينا تشارك في السباق الدرامي الرمضاني القادم بمسلسل حضرة العمدة مع الفنانة روبي، وذلك في سابع تعاون بينها وبين مجموعة فنون مصر، بعد مسلسلات ملف سري، نقل عام، الأب الروحي 2، رحيم، الطوفان وباب الخلق.

أبطال حضرة العمدة

يشار إلى أن حضرة العمدة من بطولة روبي، دينا، سميحة أيوب، محمد محمود عبد العزيز، شادي مقار، أحمد رزق، بسمة، إدوارد، نهلة سلامة، محمد الصاوي، محمود حافظ، زينب العبد وغيرهم.

والجدير بالذكر أن المسلسل من تأليف إبراهيم عيسى، إخراج عادل أديب وإنتاج مجموعة فنون مصر للإنتاج والتوزيع، للمنتجين ريمون مقار ومحمد محمود عبد العزيز، بالتعاون مع الشركة المتحدة للخدمات الإعلامية.