أحمد وفيق يكشف تفاصيل مسلسل "سره الباتع": يربط بين العصر القديم والجديد
تحدث الفنان أحمد وفيق عن مسلسل سره باتع وكواليس التصوير وتجربته مع المخرج خالد يوسف في أولى تجاربه الدرامية في المسلسلات.
تصريح أحمد وفيق عن مسلسل “سره الباتع”
وقال أحمد وفيق، ببرنامج سبوت لايت المذاع على قناة صدى البلد، تقديم الإعلامية شيرين سليمان: المسلسل واخد لب موضوع رواية سره باتع وهي قصة قصيرة وعندي شغف أتفرج على المسلسل اللي بعمله، والمسلسل عمل ربط بين العصر القديم والجديد ودخول نابليون على مصر، وهيكون عمل جديد على الدراما المصرية وهو عمل مرهق ومكلف جدًا.
أحمد وفيق:" خالد يوسف بتاع تفاصيل وأنا بحب أشتغل معاه"
وتابع أحمد وفيق:" خالد يوسف بتاع تفاصيل أوي، وهو تربية يوسف شاهين، وأنا بحب أشتغل معاه وهو مش بيتساهل خالص ومبيفوتش حاجة وأنا بحب المخرج اللي زي كدة، لأن المخرج اللي بيفوت بكرهه جدا وأقلق منه جدًا، وأفضل حاطط ايدي على قلبي لحد ما المسلسل يتعرض".
وأوضح أحمد وفيق: خالد يوسف قالي إن الدور مهم ومحوري ورابط الأحداث ببعضها وأنا اخترتك للدور ده عشان عارف أنك هتعمله زي ما أنا عايز إزاي، وأنا أهم حاجة عندي في العمل اني أشوف المخرج مبسوط من أدائي في الدور.
واختتم أحمد وفيق:" كنت مستني خالد يوسف يتغير شوية وميبقاش سينما بس، والناس هتلاقي المسلسل شوية سينما في بعض، وخالد يوسف عامل نفس ضغط السينما بنفس التفاصيل، وهنشوف عمل الناس هتتبسط منه أوي من كتر الكادرات، وأنا مبسوط بزمايلي أكتر من نفسي".
