أكثر من مهنة.. تصريحات الفنان محمد رياض في برنامج معكم

حل مساء أمس، الجمعة، الفنان محمد رياض وابنه، ضيوفًا في برنامح معكم منى الشاذلي، حيث أدلى الفنان بعدة تصريحات َخبايا عن حياته الشخصية وحياته قبل أن يدخل في عالم الفن والتمثيل.

محمد رياض وكرة القدم

قال الفنان محمد رياض إنه احترف كرة القدم في بداياته، حيث كان يلعب ضمن صفوف نادي أبو سمبل، وتم قيده في الاتحاد المصري لكرة القدم، تحت سن 19 عامًا.

وأوضح رياض، أنه اعتزل في سن مبكرة ولم يكمل مسيرته الرياضية بسبب إحدى المباريات، قائلا: كنا نادي درجة تانية، تحت سن 17 سنة و19 سنة، وقتها طلعنا دوري الدرجة الأولى وبنلاعب الأهلي والزمالك والفرق دي، وإحنا كنا فرقة بلا تمويل، مكنش فيه فلوس وكنا بنشتري الحاجات على حسابنا، وكنا بنلاعب نادي اسمه نادي المية، كنت بلعب باك رايت، في الشوط الأول الكورة اترمت من ورايا وشايفها عدت من فوقي وبيني وبين لاعب الفريق التاني 5 أو 6 متر قلت هلف براحتي ده مش هيجيبني، في ثانية مشوفتوش، الواد صاروخ خد الكورة وجاب جون، أول جون جه بسببي.

وأكمل، عرفوا بقى إني مش عارف ألاحق الواد، فيرموا الكورة من ورايا والواد صاروخ، مش عارف أضربه ولا أوقفه ولا عارف أعمل حاجة، ده كان أسرع من محمد صلاح، والله ما كنت بشوفه، بيعدي بسرعة الصاروخ، مبلمحوش، كان خرافة، خلصت الشوط الأول وطبعا غيرني المدرب، مكملتش الماتش دخلت أوضة اللبس وغيرت ورجعت البيت واعتزلت ومروحتش النادي تاني خالص.

محمد رياض وتدريس الكيمياء

كشف الفنان محمد رياض أنن تخرج من كلية العلوم، وكان يحب الكيمياء، والتحق بقسم الأبحاث والتطوير في إحدى الشركات، ووصل لدرجة أنه اخترع بعض المركبات وأطلق عليها اسمه، قائلا: أنا اخترعت حاجات، والله العظيم عملت حاجات باسمي قبل ما أسيب الشركة اللي كنت بشتغل فيها، سبتها لأن خلاص مكنش هينفع اكمل عشان التمثيل، وكنت شغال في الأبحاث والتطوير بتاع الشركة.

أوضح أنه عند تخرجه امتهن العديد من المهن إلى جانب دراسته في معهد التمثيل، قائلا: أنا كنت لسه متخرج من كلية علوم وشغال كيمائي الصبح وبشتغل في معمل تحاليل وبشتغل في مدرسة بنات 3 أيام في الأسبوع لكنهم رفدوني، كنت لسه صغير عندي 22 سنة وشعري أصفر وحليوة وبروح لابس تيشيرت وبنطلون جينز، وأول ما دخلت المدرسة لقيت الطابور بقى فيه همس، بنات بقى كلهم 18 سنة وعمالين بيتكلموا مين ده وبتاع.

أضاف: شوية ودخلت الفصل لقيت كله بنات وقاعدين جنب بعض بين الديسكات وزحمه، طلع إن البنات جم من فصول تانية يحضروا حصة الكيميا، يعني المفروض الفصل 25 بـنت لقيت عندي 60 بنت، وتقريبًا الكيميا احلوت في عينهم ساعتها.

وفي اليوم التالي طلب منه المدير ألا يحضر طابور الصباح ثانية، ففعل ذلك، واستمر في العمل لفترة، إلى أن استدعاه المدير مرة ثانية لمكتبه، قائلًا: المدير قالي أنت شخص كويس جدا ومدرس هايل ولا غبار عليك، بس أنت مش هينفع تكمل معانا، أنا عندي بنات صغيرين ومينفعش احط الزيت جنب النار، واترفدت من غير ما اعمل حاجة.

محمد رياض والتمثيل

قال النجم محمد رياض إن أول مشهد له في التليفزيون كان في مسلسل الوسية، وكان عبارة عن جملة أمام الفنان أحمد عبدالعزيز.

وخلال أول ظهور له على شاشة التليفزيون كان قد أنهى دراسته في الجامعة في كلية العلوم، لكنه كان ما زال في سنة أول في المعهد.

وأكد محمد رياض أنن كانت سينهي علاقته بالتمثيل بسبب مسلسل العائلة، ففي البداية تم ترشحه للدور، وأخذ الورق الخاص بالمسلسل، ومن ثم تم بدأ عمل بروفات، معقبا: ده كان دور عمري، خاصة وأنا لسا في البدايات، وهشتغل أمام النجم محمود مرسي، والمسلسل لوحيد حامد وإسماعيل عبدالحافظ، مكنتش مصدق نفسي لما جالي الدور، كنت طاير من الفرحة، لأنه دور هيوجدني من العدم.

وأشار إلى أن دور مشيرة الذي قدمته الفنانة ليلى علوي لم يكن قد سجل بعد، حيث كانوا ما زالوا يبحثون عن الشخصية التي ستقدم الدور، وإحنا في صالة البروفات الأستاذ وحيد حامد داخل بليلى علوي الاستوديو، وقال يا عم إسماعيل أنا جبتلك مشيرة، فحصل ترحيب كبير جدا، وأنا كنت هموت من الفرحة لأني همثل قدام ليلى علوي.

وبين أنه بعد تصوير ثلاثة مشاهد من المسلسل تم استبعاده، ليدخل في حالة اكتئاب وحزن، معقبا: لما عرفت أنهم استبعدوني من المسلسل نزلت من الاستوديو لحد بيتنا في العباسية مشي من غير ما أحس، لدرجة إني قولت إني هسيب التمثيل وأركز في الكمياء، لكن بعدها بشهرين اتصل بيا أستاذ إسماعيل عبدالحافظ وقالي إن الفنان هشام سليم كان هيقدم الدور بدالي، لكنه اعتذر بعد تصوير عدد من المشاهد، وإن الدور مكتوب باسمي، وإن ربنا اختارني للدور ده، ومن بعدها أصبحت إنسان قدري، مابقاش فيه حاجة تفرحني أوي ولا حاجة تزعلني أوي، وبقيت مؤمن جدا إن إللي ليك هيجيلك مهما كان، واللي مش من نصيبك مش هيجيلك مهما عملت.