ميدو يطالب بدعم الشناوي: "الحارس رقم 1 في مصر"
طالب الإعلامي أحمد حسام ميدو، بدعم محمد الشناوي حارس مرمى الفريق الأول لكرة القدم بالنادي الأهلي، مبديًا استيائه من الانتقادات التي نالها اللاعب خلال الفترة الأخيرة، خاصة بعد الخسارة من صن داونز بخماسية مقابل هدفين.
وأوضح ميدو في تصريحات تليفزيونية عبر برنامج الريمونتادا على قناة المحور: "مش عجبني اللي بيحصل للشناوي من انتقادات خلال آخر 48 ساعة، قولنا إن الشناوي مش مركز وعنده أخطاء لكن ده مش معناه إننا نطالب باستبعاده ونقسو في الانتقادات".
ميدو يدعم الشناوي
وتابع: "الشناوي أفضل حارس في مصر دلوقتي، ولازم نحافظ على اللاعيبة بتاعتنا، مش طبيعي إن الشناوي يتحول من سوبر مان لحارس معندوش فكرة".
وواصل: "الشناوي اترفع للسما بعد ماتش الذهاب ضد صن داونز وفي الماتش اللي هناك نزل الأرض، لازم يكون في توازن في التعامل معاه، ده حارس مرمى منتخب مصر الأول، ولو الأهلي أو منتخب مصر خسروا الشناوي هيكون في أزمة".
واختتم: "بقول لجمهور الأهلي عندكوا حارس كويس جدًا، الشناوي يحتاج للدعم في الوقت الحالي".
