روح بلغ عنها.. رضوى الشربيني ترد على أحد متابعيها

قامت الإعلامية رضوى الشربيني بالتعليق على رسالة أحد متابعي برنامجها هي وبس،  بسؤالها عن سبب مهاجمتها للرجال الخائنين.

رد رضوى الشربيني على متابعيها

وردت عليه رضوى الشربيني عبر برنامجها هي وبس، قائلة: كلنا عارفين إن الرجالة بتخون، يا أما فيه راجل فرفوش بيحب الستات، يا أما مبدأه التعدد، ولكن إنه يخون تحت ضغط دي أول مرة أسمعها، فلو فيه أي واحدة بتتحرش بيك، أو شربتك حاجة صفرا وبتضغط عليك بطريقة معينة، روح بلغ عنها وماتحطش نفسك تحت أي ضغط.

رأي رضوى الشربيني في قانون التحرش

وتابعت: قانون التحرش مش للستات بس، للرجالة كمان، روح بلغ عنها وإحنا كلنا في ضهرك، وأوعى تتكسف على فكرة، لكن فكرة إن البحر يحب الزيادة فأحب أقول لحضرتك إننا في 2023 الحكاية بقت معكوسة عشان الرجالة بقت عاملة زي بوفيه الأكل المفتوح اللي الأكل بقاله من 4 لـ 5 أيام عليه، كل واحدة تعدي تأكل وتمشي وفيه اللي بطنها بتوجعها فمش بتكرر الأكل منه مرة تانية، وفيه اللي متعودة على الأكل الحمضان ده.

وأضافت: لو الضغوط دي لأن أنت زي الطفل مع الستات اللي بيمارسوها عليك، فأشمعنا بتتحول لراجل على مراتك وتفضل تشخط وتزعق وتجعر والجيران يفضلوا يسمعوك، ولا ماما طلعتلك أن ألف مين يتمناك، كده روح اتعالج عشان تكون راجل مش متاح أو محترم احتمال برضه.

وإستكملت: على فكرة أنا مش بهاجم الرجالة الخاينة، عشان مش هيستحملوا مني دقيقتين اتكلم عليهم، أنا بس بيتطلب مني أعلق على حاجة من حد أو حد بيأخد رأي مش أكتر.

تعليق رضوى الشربيني على سجود عروس حسن شاكوش خلال حفل زفافهما

ووصفت رضوى المشهد، قائلة: صحيح هي حركة أوفر جدا وإحنا آخر حاجة كنا بنشوفها إن الرجالة هي اللي بتسجد بعد ما تجيب أجوان في ماتشات الكورة.. إحنا أخيرا شوفنا إن العرايس لما تبقى فرحانة أوي وسعيدة تبوس إيد جوزها أو راسه أو كتفه أو تحضنه، لكن واحدة ست تسجد في فرح شكر لربنا قدام الناس مشوفناهاش الكلام ده قبل كده.

ولفتت الإعلامية رضوى الشربيني إلى أنه من حق أي شخص أن يعبر عن فرحته بالطريقة التي تعجبه، كما طالبت رضوى العرائس خلال الحلقة بعدم تقليد زوجة حسن شاكوش، لأنه فعل لا يصح من وجهة نظرها.