منة فضالي في حوار خاص للفجر الفني
منة فضالي: شخصية نرجس تفتقدها الناس في البيوت..ومع الزوجة الثانية في هذه الحالات (خاص)
مسلسل جعفر العمدة صعب وتقيل وأحداثه كبيرة والعمل مع محمد رمضان ممتع للغاية
تخوفت من تقديم شخصية نرجس لأنه دور كوميدي وانا معرفش أنا كوميديانة ولا لأ
الناس كلها فرحانة بدور نرجس لأنه دور فرفوش وبيفتقده كل الناس في البيوت
لا أؤمن بالدجل وبحس إنه خرافات طبعا
لولا الجمهور مكنتش هنجح، ويارب أكون عند حسن ظنهم وأقدم حاجات هادفة
إستطاعت الفنانة المتألقة منة فضالي خطف أنظار الجمهور لها من خلال مشاركتها الرمضانية المختلفة لهذا العام في مسلسل جعفر العمدة، حيث أنها تقدم شخصية نرجس، وهى شخصية يغلب عليها الطابع الكوميدي والدرامي
وحاور الفجر الفني الفنانة منة فضالي حول شخصية نرجس في مسلسل جعفر العمدة، وعن كواليس العمل وأيضًا تحدثت عن مشاركتها في مسلسل سره الباتع..وإليكم نص الحوار/
تخوضين السباق الرمضاني هذا العام بعملين سره الباتع وجعفر العمدة كيف كانت تلك التجربتين ؟
المشاركة في جعفر العمدة وسره الباتع الإتنين مختلفين والإتنين مع مخرجين كبار وإنتاج كبير وكل مسلسل فيهم نجومه أتقل من التاني، فـ دي محدش هيتردد فيها طبعًا.
سأبدا معكِ بجعفر العمدة..كيف ترين نرجس من وجهة نظرك ؟
دور نرجس بالنسبالي مختلف؛ لأنه كوميدي أكتر من إن هو دراما مع إن فيه دراما لكن مشاهده كانت أصعب، يمكن كمان أول مرة أشتغل مع محمد رمضان وكنت متخوفة في الأول مع إني أعرف رمضان كويس بس بما إني مشتغلتش معاه قبل كده فـ كنت متخوفة لوهلة.
وما أكثر ما حمسك للمشاركة في هذا العمل ؟
مسلسل صعب وتقيل وأحداثه كبيرة جدا والشغل ممتع جدا واللوكيشن كانت تحفة بصراحة.
دور نرجس مختلف تماما عن أدوارك السابقة.. كيف كانت إستعدادتك لهذا الدور ؟
استعداده بقى كنت بذاكر وكل حاجة بتناقش فيها مع محمد سامي مبنفوتش حاجة وبتناقش في كل التفاصيل.
وما هو التحدي في الدور؟
التحدي في الدور إن أنا أول مرة بعمل كوميدي وخصوصا معرفش أنا كوميديانة ولا لأ، لأن أنا طول عمري ممثلة دراما وتراچيدي
فـ بالنسبالي ده كان تحدي.
ما أبرز ردود الأفعال التي تلقيتها عن دورك في دور نرجس؟
الناس كلها فرحانة بدور نرجس لأنه دور فرفوش وبيفتقده كل الناس في البيوت فـ بيقولك دي الست العسل بتاعة البيت فـ أنا مبسوطة أوي بردود الناس الكومنتات اللي بتجيني تجنن.
حدثينا عن كواليس العمل مع الفنان محمد رمضان ؟
الشغل مع محمد رمضان ممتع ممتع ممتع للغاية، وهو إضافة لأي حد حقيقي، نجم كبير وشاطر وذكي والشغل معاه حلو
كواليسنا كانت عسل وهو دمه خفيف وسكر بصراحة.
هل سيحدث تحول لدور نرجس في الحلقات القادمة ؟
أكيد هيحصل تحول، بس هو ايه بقى دي خلينا نسيبها للجمهور يتفرج لأن اللي جاي أحلى بإذن الله.
انتِ كـ منة فضالي ما رأيك في تعدد الزوجات؟
مبحبش تعدد الزوجات، إلا إذا في سبب ما، إذا الزوجة عندها عيب خلقي، مبتخلفش، مريضة
هنا ممكن يبقى في زوجة تانية
بس مش تالتة ورابعة يعني بحس إنه كتير وهيكون في ظلم
مهما هيكون الراجل عادل بين الزوجات هيجي على واحدة منهم أيًا كان.
تبين لنا من دور نرجس أنها تستعين بالدجالين لإصلاح أمور حياتها.. ما نصيحتك لكل من يؤمن ويفعل هذا؟
أنا لا أومن بالدجل والحاجات دي بصراحة، مليش فيها، بس يعني في ناس ييعتقدوا بيه وبيعملوا بيه وإنه بيجيب نتيجة.. أنا معتقدش في الكلام ده بحس إنه خرافات طبعا.
أنتقل معكِ للحديث عن سره الباتع كيف تصفين تجربتك في عمل وطني مثل هذا ؟
سره الباتع عمل مهم جدا جدا ومرحلة كبيرة جدا عندي، أولًا مسلسل من إخراج أستاذ خالد يوسف وده أول عمل تليفزيوني له في الدراما فـ أنا طبعا محظوظة إن أنا بشتغل معاه في أول عمل من أعماله الدرامية
مسلسل وطني ومهم وبيناقش حاجات كتير وفي كذا قضية في المسلسل.
من وجهة نظرك كـيف يستطيع الفنان التوفيق والموازنة بين أكثر من عمل مثلما تشاركين أنتِ في جعفر العمدة وسره الباتع ؟
أنا الحمدلله كان عندي القدرة وبدأت سره الباتع الأول وبعدين جعفر العمدة بعد ما كنت خلصت شوت كبير جدا من سره الباتع فـ كده كان عندي وقت كبير إني اذاكر المسلسلين، هو طبعا ضغط ومجهود ولكن التوقيت كان في صالحي الحمدلله.
ماذا أضاف لكِ العمل مع المخرج خالد يوسف في سره الباتع؟
مخرج متميز، مخرج سينمائي، مخرج شاطر جدا وبيحب الممثل، حساس جدا وبيدي طاقة للممثل، بيذاكرله، مش لاقياله وصف لأنه كل حاجة حلوة
أنا إضافة ليا اني اشتغلت معاه وبشكره على الفرصة دي وأتمنى أشتغل معاه تاني وتالت
الشغل مع أستاذ يوسف ممتع جدا وقد ايه هو راجل فعلا مدرسة.
ما هى أكثر الأعمال التي جذبتك في المنافسة الرمضانية لهذا العام ؟
يعني أنا لسة ملحقتش أتفرج عشان أحكم، ولكن في مسلسلات كتير هبقى أتابعها بعد رمضان إن شاء الله.
منة فضالي نجحت في كسب قلوب جمهورها من خلال الأعمال التي قدمتها على مدار مشوارها الفني.. فـ ما هى رسالتك لجمهورك؟
الحمدلله أنا كسبت الجمهور بس منقدرش نقول كله؛ لأن مفيش حد محبوب من كل العالم ولكن أنا بشكر كل الناس اللي وقفت جنبي وساعدتني وبيدعموني وأنا نجحت بالجمهور ولولا الجمهور مكنتش هنجح؛ لأن ده دعمهم ليا ويارب دايما أكون عند حسن ظنهم وأقدم حاجات مفيدة وتبقى هادفة والناس كلها تحبها، ودايما يبقوا في ضهري علطول ويشجعوني.
