حمادة هلال: "أولادي مبيتفرجوش على رعب مصري بس بيعشقوا المداح" (خاص)

انتهى فريق عمل مسلسل "المداح أسطورة العشق" «المداح 3» أمس من تصوير الجزء الثالث عن طريق إقامة حفل صغير للاحتفال بذلك الحدث بحضور أبطاله، وخلال الحفل التقى "الفجر الفني" بـ الفنان حمادة هلال وأدلى خلال اللقاء عدد كبير من التصريحات التي تخص دوره بمسلسل وتحدث عن رأيه في بعض الأمور وإليكم أبرز التصريحات

حمادة هلال يتحدث عن عائلته ومشاهدتهم للمداح

تحدث حمادة هلال عن عائلته: "ولادي بيتابعوا المداح ومن جمهوره ودي المفاجأة برغم إنهم مش بيتابعوا عربي خالص وأنا دايمًا بزعل منهم وبحاول أقنعهم إننا عندنا حاجات جميلة تستحق المشاهدة ولكن هما ذوقهم أجنبي جدًا، وبيعشقوا المداح لأنه فيه حاجات ليها علاقه بالبطل الخارق والنوع ده هما بيفضلوه جدًا".   

وأردف عن صعوبة المشاهد: "كل تصوير المداح سواء من الجزء الأول للتالت كان صعب ومتعب أنا لو بصور مشهد صغير بشوفه صعب لأن صابر شخصية مختلفة وله ريأكشنات مختلفة ومخصصة ولازم يقول جُمل معينة مش أي حاجة لأن دي توجهيات المخرج".

حمادة هلال يتحدث عن أحمد سمير فرج

تحدث حمادة عن المخرج وقال: "أحمد مش سايبني ودايمًا بيوجهني يقولي انت ناسي ده جاي منين وده رايح فين ولازم يبقي إحساسه لايق على إلى قبله والي بعده فبيقولي لازم المشهد ده طاقة أعلى أو أهدى شويه فهو دايمًا بيحاول يوجهني للطريق الصح من وجهه نظره"

وتابع عن إمكانية خوض تجربة الكوميدي: "وارد أعمل دراما كوميدي، لأن الكوميديا في دمي أنا مش كوميديان لكن بكون عايز أعمل حاجة مختلفة لأن الكوميديا صعبة جدًا من أصعب أنواع الفن وعايز أخوض التجربة بحاجة محترمة".     

وفي نفس السياق، ألتقى الفجر الفني بهبة مجدي وتحدثت عن دورها بالمداح وقالت: "أنا بخاف وعمري ما قريت في حاجات الجن والأجنبي بيبقى مجرد خيال وأحنا بنخاف لأننا بندخل في المود إنما إلى بنتكلم فيه ده واقع وموجود ومحتاجين يبقي إيماننا قوي ونستعيذ بالله من الشياطين الرجيم دايمًا عشان الحاجات دي أكبر مننا".

وأردفت: "الأيام إلى فاتت مكنتش بنام كويس وبيجيلي كوابيس وخلصت مشاهدي وأنا تعبانة نفسيًا وأتمنى أخد أجازه وبعدها أروح لحاجة كوميدي أو غنا لأن المداح كان صعب أوي عليا ومحتاج تركيز مني".

تفاصيل مسلسل المداح

يشارك في مسلسل المداح 3 أسطورة العشق العديد من الفنانين، منهم: هبة مجدي، حمادة هلال، محمد رياض، خالد سرحان، دنيا عبد العزيز، محمد عز، يسرا اللوزي، خالد زكي، لوسي، أحمد ماهر، تامر شلتوت، حنان سليمان، صبحي خليل، عفاف رشاد، هلا السعيد، هايدي رفعت، بسمة ماهر، محمود عامر، عبير فاروق، سلمى أبو ضيف، عبد العزيزمخيون، أحمد كشك، محمد مهران، أحمد بدير، وائل ترك، حمادة مجدي، كنزي هلال، عصام السقا، والمسلسل من تأيف وليد أبو المجد وأمين جمال، وتحت قيادة المخرج أحمد سمير فرج.