بعد تصدره التريند.. مصطفى حشيش لـ "ياسمين عز: "أرفض عمل المرأة.. وأنا سي السيد في بيتي"

تصدر الفنان مصطفى حشيش تريند مؤشرات بحث جوجل من خلال برنامج كلام الناس، والذي تقدمه الاعلامية ياسمين عز من خلال شاشة mbcمصر، وكشف حشيش عن أسرار حياته ورأيه بالمرأة وغيرها من الأمور.

مصطفى حشيش يكشف سبب رفضه لبعض الأدوار
 

وأضاف: "برفض أدوار كتير واختياراتي دقيقة، لإني ما ينفعش أطلع بشخصية اتهزأ فيها أو بتضرب، لإن ده قدام الطلبة بتوعي شيء مش لطيف، لذلك بنتقي أدواري، وفي النهاية لو أنا وظيفتي ممثل فقط هعمل كل الأدوار ولكني محكوم بإني أستاذ جامعة في الأساس".

 

مصطفى حشيش يطلب السماح من السيدات لهذا السبب

وتابع:" أنا آسف للستات كلها أنا سي السيد في بيتي، لإن برضه الست الهانم بتاعت البيت، وأنا بقدر الست ومراتي اللي هي ست البيت وستي، بتملك كل شيء وأنا لا أملك شيء، وبيتي والفلوس وحتى عربيتي باسمها". 

 

وأشار:"هو فيه أكتر من كده احترام للست أو تقدير للست أو أمان للست، يا جماعة كل ما الست هتقدرك وهتشيلك فوق راسها، أنت طبيعي هتشيلها فوق راسك، وبالنسبة لي الست هي ست البيت وستي أنا كمان لإني من ضمن البيت".
 

مصطفى حشيش يكشف وجهة نظره في عمل المرأة 

 

وأوضح:"بشوف الحالة دي سلبية جدًا والمفروض الست المتجوزة تبطل شغل، وجوزها يجبرها على كده حتى لو هيعيشها على قد مرتبه، وأنا لما اتجوزت مراتي مقدمتش ليها مهر وما طلبتش منهم يجيبوا لي حاجة وقلت لهم عاوزها بشنطة هدومها علشان لما أجيب فازة وأنا بشتغل واتعصب عليها لما تيجي تنضف البيت وتنضف الفازة تعرف أنا قد إيه تعبت علشانها، لكن لو الفازوة جاية بسهولة هتكسرها، ولازم كل ست تعيش على قد دخل جوزها وما تشتغلش".

 

لهذا السبب مصطفى حشيش يمنع ابنته دخول المجال الفني 
 

وأكد: "ممنوع أخلي بنتي تمثل علشان شايف قد إيه الممثلين بيتعبوا وقد إيه متبهدلين في الشغلانة وبيسيبوا بيوتهم، لإننا بنقعد في الاستوديو عشرين ساعة فلو واحدة متجوزة وعندها عيال تسيب بيتها 20 ساعة. 

 

وواصل: "فأنا شايف الزملاء الفنانات متبهدلين في المهنة ودي بنتي وستي وتاج راسي وهي المتحكمة فيا ولإني بحبها بقول كده". 
 

واختتم: "حاجتين محدش بيعملهم لي في البيت، رغم إني سي السيد، بحب أعمل لنفسي كوباية قهوة، لإني مليش كيف إلا في القهوة وماليش في السجاير ولا المياه الغازية ولا عمري شربت نقطة بيرة، وهو فنجان القهوة كيفي، وبحب أغسل شراباتي بنفسي، ومن كتر نظامي عارف كل حاجة في الدولاب ومراتي بتجيب لي الهدوم وتحطها على السرير وأنا بنظمها في الدولاب".
 

معلومات عن مصطفى حشيش

مصطفى حشيش (مواليد 13 مايو 1953) هو ممثل مصري بدأ حياته الفنية في بداية الثمانينات بأدور صغيرة وثانوية، شارك في العديد من المسلسلات ومن أبرزها:هوانم جاردن سيتي (1997)،، أوبرا عايدة (2000) وشط إسكندرية (2008)، وتفوق الكثير من الأعمال الدرامية والسينمائية والتي لا تزال خالدة بين الجمهور.