ميمي جمال: منى زكي تستحق أوسكار.. وياسر جلال فنان كبير

كشفت الفنانة ميمى جمال عن رأيها في النجمة منى زكي والفنان محمد رمضان.
 

وقالت ميمي جمال خلال مقابلتها لبرنامج "واحد من الناس": "أنا لو فى إيدى أمنح أوسكار لمنى زكى عن مجمل أعمالها، وبحب شادية وفايزة أحمد، وصباح، وأنا غنيت فى فيلم لصوص لكن ظرفاء مع عادل أمام العتبة جزاز والسلم نايلو في نايلو".

 

وأضافت: " محمد رمضان فنان ذكي وعمل أدوار متنوعة كتير وأكيد ربنا هيكرمه".

 

وتابعت: "أنا طباخة شاطرة، وكان الفنان حسن مصطفى جوزي بيحب الكشك والرقاق، والملوخية من إيدي".
 

وعن دورها فى مسلسل علاقة مشروعة، قالت: "أنا راضية عن المسلسل وياسر جلال فنان كبير، ومي عمر عملت الدور كويس وما خفتش منه، وداليا مصطفى هايلة والمخرج خالد مرعي متميز".
 

وقالت:" اشتغلت في مسرحية مدرسة المشاغبين بدل سهير البابلي علشان جالها مرض في عينها وقت العرض، والمنتج سمير خفاجي أصر إني أعمل الدور بدل سهير بدل ما نوقف العرض لحد ما ترجع".
 

وأكدت:" عملت 3 بروفات مع الملقن، واشتغلت مكانها 15 يوم، وسمير خفاجي كان بيصفق لي، وقالي شطارة والله يا ميمي".

 

وواصلت:" اشتغلت مع سمير غانم في المسرح أنا وحسن في مسرحية دو ري مي فاصوليا، ولازم اللي يشتغل معاه يكون صاحي ومركز، وهو كان بيقول عليا عمود الكردان بتاع المسرحية".

ميمي جمال: أنا وحسن مصطفى كتبنا ثروتنا لبناتنا علشان يرتاحوا

 

واختتمت:" أنا وحسن كتبنا كل ثروتنا في حياتنا كلها لبناتنا علشان يرتاحوا ويفرحوا، وأنا لو نكدت على جوز بنتي هينكد على بنتي، أنا مبتدخلش في حياتهم وأنا مصاحباهم ولو هو متضايق من بنتي بييجي يحكيلي".