حنان شوقي:" ياريت أدخل في قصة حب..وأنا ممكن أحمّي زوجي وأعامله زي ابني"

أعربت الفنانة حنان شوقي عن أمنيتها في الارتباط مرة أخرى، بجانب حديثها عن علاقتها بوالدها الراحل.

الحب الحقيقي في حياة حنان شوقي 

وقالت حنان شوقي خلال لقائها في برنامج "قعدة ستات" الذي تقدمه الإعلامية مروة صبري عبر قناة "القاهرة اليوم": الحكاية بين الراجل والست حرب، ودي بعيدة كل البعد عن الحب الحقيقي، وأنا بالنسبة ليا (أنا أنت)، وياريت أبقى في قصة حب، والست بـ 100 راجل، أحميه زي ابني، وألبسه وأحطله برفان وأقص له أظافره، وألمع له حزائه وألبسه الشراب، وهو يعملي كده، والحبيب الزوج ده بيبقى ابني وصديقي وأخويا وأبويا وأمي وصاحبي وكل حاجة في حياتي، فأنا بفصل في تعاملاتي، وأنا لما بحب بعمل كده.

علاقة حنان شوقي بوالدها

أما عن علاقتها بوالدها، فعلقت حنان شوقي قائلة: بابا كان صاحبي من وأنا صغير، أنا بالذات عن إخواتي كان صاحبي جدًا، ولو حصل موقف حصل وحد عاكسني في الشارع وسألني عملتي إيه أقوله مردتش، يقولي شاطرة لأنك مش عايزة تردي.

وتابعت: "خدت منه حنيته ورجوليته وجدعنته، وهو اللي زرع جوايا الصدق وإني أقول الحقيقة، وزرع فيا المسئولية وإزاي أتعامل، ولما أبويا انتقل لـ رحمة الله كنت صغيرة أوي وكنت محتاجة ليه، وربنا صبرني وصمدت صمود الجبال، ومكنتش مصدقة إنه انتقل إلى رحمة الله".

رأي حنان شوقي في أزمة حلا شيحة الأخيرة 

كما كشفت حنان شوقي، عن رأيها في أزمة الفنانة حلا شيحة الأخيرة، قائلة: أنا مبقرأش الحاجات اللي في صفحة حلا، أنا مع نفسي بس، إنما الحالة بتاعة حلا لا يعلمها إلا اللي خالقها، وأنا بحترم كل آرائها، وهي حرة أنها ترضي جوزها لو طلب منها تتحجب.

برنامج قعدة ستات 

برنامج "قعدة ستات" تقدمه الإعلامية مروة صبري على شاشة "القاهرة اليوم" يوم السبت من كل أسبوع، وتستضيف من خلاله عددًا من الفنانات وتناقش قضايا مختلفة.