مدين لـ "الفجر الفني": أنا مُقصر في تقديم أغاني خاصة بي.. وهذا سر الكيمياء بيني وبين تامر حسين (خاص)

يجذب انتباه الجمهور دائمًا بتقديمه لألحان أغاني كثيرة تستطيع أن تحقق نجاحًا كبيرًا وتتصدر التريند وهو الملحن والمطرب "مدين "وبدأ يطالبه الجمهور بتقديمه لأغاني كثيرة بصوته 

وكشف مدين في  تصريح خاص لـ "الفجر الفني" عن أسباب عدم تقديمه أغاني كثيرة له، وتحدث أيضًا عن سر الكيمياء بينه وبين الشاعر تامر حسين كما أوضح أكثر شئ يثير عصبيته في السوشيال ميديا، وأيضًا كشف لنا عن سبب عدم تقديمه أغاني كثيرة مع نجم الجيل تامر حسني.

وعن سبب عدم تقديمه أغاني كثيره بصوته باستمرار تحدث قائلًا: "بالنسبة للغناء أنا عارف أني مُقصر في حق نفسي شوية يمكن عشان ربنا كرمني كملحن بنجاح كويس الحمد لله، ف مبقتش عايز أعمل نجاح أقل من النجاح اللي حققته كملحن وده اللي بيخليني متردد شوية وخايف أن أنزل بأغاني متحققش نفس النجاح اللي حققته كملحن فيمكن ده اللي بيأخر خطوتي شوية في الغناء".

وتحدث مدين عن سر نجاح أغنية "العُمر" للفنانة أصالة تتر مسلسل "لا تطفئ الشمس" قائلًا: "أعمالي مع أصالة الحمد لله كلها حققت نجاح كبير جدًا بعيدًا كمان عن تتر مسلسل "لا تطفئ الشمس" ده مسلسل من المسلسلات المهمة والأغنية حققت نجاح كبير جدًا وقتها ولحد دلوقتي فعلًا لما حد بيسمعها كأنه بيكون أول مرة يسمعها".

وتابع قائلًا: "فده طبعًا عمل قريب جدًا من قلبي وأغانيا كلها مع أصالة الحمد لله حققت نجاحات كبيرة وعملنا مع بعض أغاني كتير زي (شخصية عنيدة- بجد تجنن-هو حبيبي-مواقف مؤلمة-على ايه- كل ما تفتكره بتسرح-قاصد ايه-جابوا سيرته) وفي عمل قريب من أهم الأعمال يعني اللي مستنيها الفترة الجاية.

وأزاح مدين الستار عن سر الكيمياء بينه وبين الشاعر الغنائي تامر حسين قائلًا: "يمكن شغلي مع تامر حسين له شكل مختلف وله كيميا مختلفة لأن هو صاحبي من سنين كتيرة وعشرة عمر كبيرة وكنا صحاب أكثر ما إحنا نشتغل مع بعض يعني مجمعناش شغل في البدايات كتير كل واحد كان بيحقق نجاحات الحمد لله لوحده".

وأضاف: "لما جمعنا شغل جمعنا مؤخرًا فالكيميا الحلوة دي لما تترجم لشغل أكيد الحمد لله هتوصل للناس"

وكشف مدين عن أكثر شئ يثير عصبيته عبر السوشيال ميديا قائلًا: "أكثر كومنت ممكن يعصبني هو الكومنت السلبي أن حد ينتقد حد بسلبية رهيبة جدًا أو هجوم شرس، مش هجوم حتي أنه غيران على الفن معاه أو غيران على مستواه في الأغنية دي".

وتابع: "أي عمل سواء عندي أو عند غيري سواء في المجال بتاعنا أو غيره أنا بستغرب جدًا ان ليه حد يتكلم بالطريقة دي ومين اللي اداله الحق يتكلم كده دي أكثر حاجة تعصبني".

وعن سبب عدم تقديمه أغاني كثيرة مع نجم الجيل تامر حسني، وضح قائلًا: "والله تامر حسني من الفنانين اللي بموت فيهم وبحبهم جدًا بس عندنا دائمًا مشكلة في شغلنا مع بعض، زي مثلًا أني أبعتله الأغنية فيرد عليا بعدها بشهور كتير ف أكون أنا أفتكرت أنه مش عايزاها ف أكون اتصرفت فيها أو اخذها حد تاني من النجوم الكبار بردو وتحقق نجاح، فنرجع تاني نشتغل مع بعض أو يبعتلي أو ابعتله".

وأضاف: "فالنقطة دي هي اللي عاملة لغبطة بينا لكن فنيًا أنا بحبه جدًا، لما اشتغلت معاه في مسلسل فرق توقيت عملت أغنية حلوة جدًا ولحد دلوقتي لما تنزل بيكون رد فعل الجمهور عليها حلو جدًا وفي ناس مسمعتهاش فبيفتكروها أغنية جديده لسه نازلة، وحققت بردو معاه نجاح كبير الحمد لله في أغنية نفس النهاية في 2020 وأكيد طبعغا أكون حابب أكرر التجربة معاه 1000 مرة كمان هو على المستوي الشخصي أجدع وأجمل الناس اللي ممكن حد يقابلهم"