بعد إنجاب مولوده التاسع.. تامر أمين لرضا البحراوي: "عزوتك من أصحابك وبالراحة على مصر"
وجه الإعلامي تامر أمين، رسالة للمطرب الشعبى رضا البحراوي، وذلك بمناسبة مولوده التاسع "ريان"، مهنئًا له بالمولود، وقائلًا: "الناس اللي فاتحة باب الخلفة على البحري، كتير علينا".
كتير علينا وعلى مصر
وأضاف تامر أمين، خلال مقدمة برنامجه "آخر النهار"، المذاع عبر فضائية "النهار"، مساء اليوم الأربعاء: "أولًا ألف مبروك يا رضا، ويارب تفرح بذريتك، وقبل ما أتكلم ربنا يزيد ويبارك، وربنا يديك الصحة، بسم الله ما شاء الله، بس كلامي لرضا وكل رضا أنا بسأل سؤال: مش كتير علينا إحنا".
وتابع: "هتقولي وإنت مالك، هو إنت اللي هتصرف عليه وهتربيه، هقولك ربنا يقدرك وتطلعه أحسن الناس، بس هو كتير علينا وعلى مصر، وكلامي مش بس لرضا، كلامي لكل الناس التانية اللي فاتحة باب الخلفة على البحري، كتير علينا".
مولود كل 14 ثانية
وذكّر بإعلان الجهاز المركزي للتعبئة العامة والإحصاء، والذي أشار إلى وجود مولود جديد في مصر كل 14 ثانية، يعني 4 مواليد في الدقيقة الواحدة، قائلًا: "4 مواليد كل دقيقة عايزين 4 أماكن في المدارس، و4 أماكن لا قدر الله لو مرضوا في المستشفيات، وعايزين 4 أماكن في المواصلات، ودعم وبطاقات التموين وشقق وفرص عمل".
خد عزوتك من أصحابك
وأضاف تامر أمين، أن تفسير رضا البحراوي لإنجابه الكثير من الأبناء بسبب حبه للعزوة، موجهًا له رسالة: "خد عزوتك من أصحابك وأهلك وأولادك، لكن كفاية اثنين أو ثلاثة أو أربعة، لكن تسعة، ورضا لسه شباب، يعني لو كمل على المسيرة دي مش هنلاحق عليه، بسم الله ما شاء الله، ربنا يديك الصحة".
واستطرد: "القصة هنا مش رضا، أنا بقول لكل الناس في مصر بالراحة على مصر، إنتوا شايفين الأوضاع والأزمات والأسعار والموارد، واحدة واحدة".
