تامر حسني داعمًا للقضية الفلسطينية: "ثقوا في الله أن وعد الله حق"

تمر الدول العربية بفترة صعبة جراء الأحداث التي تمر بها دولة فلسطين الشقيقة، حرص عدد من نجوم الوطن العربي على دعم القضية الفلسطينية ومساندة الشعب الفلسطيني، وكان أبرزهم الفنان تامر حسني، ووجه نصيحة لمحبيه الذين يتساءلون عن وجود الله في حل خلافاتهم، حيث كان حريصًا خلال الفترة الأخيرة على التقرب من الجمهور وتوجيه العديد من الرسائل لهم، مؤكدًا أن وعد الله حق.

ونشر تامر حسني منشورًا عبر حسابه الشخصي على موقع "الفيس بوك"، عن أهمية الإيمان والعقيدة وكتب: "في الوقت ده ناس كتير إيمانها بربنا ممكن يتزعزع أو ينهار ويقولوا طب ربنا فين مش هرد بالآيات والأحاديث عشان في ناس أحق مني يتكلموا بلغة الدين بس أنا هرد رد بسيط من واقع الدنيا، أنت لو دخلت فيلم وجالك تليفون فاستعجلت ومشيت في ربعه الأولاني هل تقدر تحكم على نهاية الفيلم أكيد لأ يعني متحكمش على حاجه لسه مش خلصانة".

وأردف: "طب الدنيا لسه شغالة مخلصتش يعني متعرفش بكرا ربنا شايل ايه متستعجلش وتحكم على الدنيا وأنت لسه مشوفتش مرحلة النصر اللي ربنا وعد بها أصلًا في قرآنه متحكمش دلوقتي حكمك هيكون غلط احنا لسه مكملناش الدنيا للآخر، يمهل ولا يهمل واللي راحوا دول جريوا على الجنه اللي هي الحياة الأساسية حياة الخُلد راحوا دار الحق ومشيوا من دار الباطل".

وأكمل تامر حسني: "يا جماعة الدنيا دي ولا حاجة دي دار باطل فيها الشر والكره والحقد والظلم، لكن الناس دي راحت لحياه كلها حب وخير وسلام وفرح ولما في الآخره نشوف كل حد كانت حياته صعبة ومليانة معاناه ازاي ربنا كافئه على صبره وتحمله من كل اللي شافه وكرمه بأجمل نعيم الجنه هنقول ياريتنا كنا إحنا الصبر يا جماعة والثقة في وعد ربنا".

تامر حسني: ثقوا في الله أن وعد الله حق

واختتم تامر حسني حديثه، قائلًا: "الدنيا دلوقتي وسكان الأرض انقسمت 2 ناس إيمانهم راح وناس اتمسكوا بعقيدتهم أكتر ودول أول ناس كسبوا معركة الدنيا، ثقوا في كاتب الدنيا العظيم أنكم لازم هتسقفوا في النهاية من حلاوة نصره وهو بينصر المظلوم بمعجزة من عنده تتحقق في الوقت المناسب اللي يعلمه هو مش إحنا والله والله والله لازم يبقى معندناش شك نهائي في رحمته وفضله اكسبوا المعركة يا جماعة اوعوا إيمانكم بربنا يتهز احنا كلنا أصلًا عايشين في اختبار ولازم ننجح فيه إن شاء الله هتشوفوا بعنيكم أكبر رد من ربنا كما وعد في قرآنه الكريم ثقوا في الله أن وعد الله حق".