مفيدة شيحة تدافع عن محمد صلاح.. وسهير جودة: "الهجوم من كتائب إخوانية"
دافعت الإعلامية مفيدة شيحة، عن محمد صلاح لاعب المنتخب الوطني وليفربول الإنجليزي بعد الهجوم الذي تعرض له عقب إصابته قبل نهاية الشوط الأول من مباراة مصر أمام غانا التي انتهت بالتعادل الإيجابي بهدفين لكل فريق ضمن منافسات الجولة الثانية من المجموعة الثانية لبطولة كأس أمم إفريقيا.
من حقه يقلق على نفسه
وقالت "مفيدة شيحة" خلال تقديم برنامجها "الستات" المذاع على فضائية "النهار" مساء اليوم السبت، "أنا شايفة أن فيه لغط غير طبيعي بيحصل والسوشيال ميديا حطته في دور الشرير".
وأضافت "هو اتصاب من حقه إنه يقلق على نفسه عمر ما ده كان إدانة لأنه لاعب له شأن مش لازم يجيب نفسه الأرضن شوفنا كم الإشاعات والتدمير على السوشيال ميديا أنه انسحب علشان محبش يخسر".
صلاح لاعب عالمي
وتابعت متسائلة "ايه كم الغضب ده النهاردة كان ممكن يقول أنا مرتبط الفترة معلش مش هقدر أجي، مفيش أي حاجة تجبره وفكرة أننا طول الوقت لو خدمنا يبقى حبيبنا وكفاءة ولو معملش كده يبقى بيمثل ويستهبل".
واستطردت "صلاح لاعب عالمي وليس من الشخصيات الجبانة أو المتخاذلة، محمد صلاح رغم كل الظروف جه وعمل اللي عليه ولسة في المعسكر وأنا مش معجبة بطريقتنا في التعامل مع الأشخاص وكأن فيه ناس حطت نفسها هي القاضي والحاكم".
كتائب إخوانية تهاجم
من جهتها قالت الإعلامية سهير جودة، إن الهجوم على محمد صلاح من قبل كتائب الإخوان، مستطردة "إحنا بنزايد على صلاح وكتائب الإخوان تشتغل عليه بلا هوادة وفكرة كتائب الإخوان تهاجم وتضعه هدف للهجوم والهدف غير منطقي وغير طبيعي".
وأردفت "عندي أي مشكلات اسقطها واعكسها على كرة خلينا شوية نبقى موضوعين، ونشوف صلاح بيعمل ايه لمصر واسم مصر، ومش مجرد ماتشين في البطولة الأداء كان وحش لعدة أسباب منها منظومة اتحاد الكرة والاستعدادات والمدير الفني نفسه مش حاجة واحدة نحكم بها على تاريخ وعطاء ومسيرة إنسان".
