"صاحبي أخد الطعنة بدالي".. ننشر أقوال المجني عليه في جريمة قتل صديقه أثناء الاحتفال بعقيقة طفل بإمبابة

حصل موقع "الفجر" على أقوال المجني عليه ضحية الشروع في القتل على يد شاب أثناء الاحتفال بعقيقة طفل أحد أصدقائه بإمبابة، حيث شهدت دائرة القسم جريمة قتل بشعة بإقبال متهم يدعى محمد عربي على قتل شهيد الشهامة يدعى صلاح فتحي، والشروع في قتل صديقه عبدالله، بعد نشوب مشادة كلامية بينهم. 

وفي السطور سنعرض أقوال المجني عليه "عبدالله. ع" 21 سنة في تحقيقات النيابة العامة:

س: ما تفصيلات حدوث الواقعه ؟

اللي حصل إن أنا و"صلاح فتحي نصر" ومعانا أصحابنا كنا معزومين في عقيقة عند واحد صاحبنا اسمة "حمادة" وكان فيه ناس كتير معزومة، وروحنا وجاملنا الراجل وساعتها واحد صاحبنا اسمه "رضا" شد مع واحد من اللي كانوا قاعدين علی ترابيزه جنبنا وكان على الترابيزه دي "محمد عربي" المتهم وساعتها محمد ادخل وشد مع رضا صاحبي وأنا اتدخلت واتكلمت مع محمد إن الموضوع مش مستاهل وقولتله هدي نفسك مش كده، وهو رد عليا قالي إنت مالك ما تدخلش في اللي مالكش فيه وما تتكلمش معايا وساعتها الموضوع قلب بخناقة.

وتابع المجني عليه: حماده صاحب العقيقة تدخل علشان ما نتخانقش عنده، والموضوع خلص على كده وبعد شويه محمد عربي، والناس اللي معاه قاموا مشيوا وركبوا عربية لونها فضي وساعتها، أنا وصلاح ورضا وثلاثة أصحابنا كمان قولنا نروح وراهم علشان رضا كان عايز يتكلم مع المواد صاحب محمد عربي اللي شد معاه، وفعلا أنا وصلاح ركبنا موتوسيكل بتاع رضا، وصلاح كان سابق، ورضا وواحد صاحبنا اسمه محمد خلف مصطفي غلاسه راكبين موتوسيكل ثاني، وواحد صاحبنا اسمه سامي شارون كان راكب موتوسيكل ثاني لوحده ومشينا ورا العربية، الفضي في شارع الاعتماد ودخلنا على شارع امتداد الوحدة وبعدها دخلنا على شارع الوحدة نفسه وعدينا على محل اسمه جوري الشام وقابلنا واحد صاحبنا اسمه حسن عوض قالنا رايحين فين فرديت عليه وقولتله ان رضا شد مع واحد ورايحين نقعد معاه هناك.

وذكر المجني عليه: ركب معايا أنا وصلاح وبعدها دخلنا على شارع الغيط ولقينا العربية مكمله لغايت نص شارع الغيط فساعتها رضا ومحمد خلف فضلوا مكملين ورا العربية وأنا واللي معايا رجعنا ثاني عند محل جوري الشام اللي في شارع الوحدة وبعد نحو عشر دقايق لقيت محمد عربي طالعلنا من شارع الغيط وجاي عليا وبيقولي تعاله عايزك فاللي كانوا معايا، قالولو فيه ايه قالهم أنا هاتكلم معاه بس فمشيت أنا وهو لحد ناصية المشاريع وقالي انت كنت بتكلمني كده ليه.

وحسيته عاوز يعمل مشكلة فقولتله أنا ماعملتلکش حاجه، انت عايز مني ايه، قالي انا عايز منك دم ولقيته مطلع مطواه من جيب الجاكت اليمين وراح ضاربني بيها في وشي معورني وفي دراعي وبطني وساعتها، صلاح جري عليه ولسه هايضربه راح محمد عربي مشيله المطواه في قلبه وصلاح وقع مات في ساعتها وبعد كده محمد عربي راح ضاربني في بطني ثاني، وبص على صلاح وطلع يجري ناحيه شارع الغيط وساعتها الناس اللي معايا جريوا على صلاح وأنا كل اللي فاكره اني كنت سايح في دمي وركبت توك توك مع ناس معرفهمش ودوني المستشفى المركزي وهناك حولوني على معهد ناصر واتعالجت.

س: متي حدثت تلك الواقعة؟

الكلام ده حصل يوم الأحد الموافق ۲۰۲۲/۲/۲٦ نحو الساعة ٧:٣٠ أو ٨:٠٠ مساء

وأين أبصرت المتهم محمد عربي إبراهيم حامد لأول وهلة؟

في عقيقه تخص واحد صاحبنا اسمه حماده بشارع ٣٤ متفرع من شارع الاعتماد إمبابة.

س: من كان برفقتك آنذاك؟

كان معايا صلاح فتحي نصر محمد عبدالله وأربعه تانيين أصحابنا.

س وما هي أسماء من كانوا برفقتك ثلاثيا؟

أنا معرفش أسمائهم كاملة بس هما كانوا رضا وجهه وسامي شارون ومحمد خلف ومصطفى علامة.