بقيت صوفي ولسة بدور على معنى الدين.. أبرز تصريحات أحمد الفيشاوي ببرنامج "على المسرح "
حل الفنان أحمد الفيشاوي، ضيفًا على برنامج “على المسرح”، الذي تقدمه الإعلامية منى عبد الوهاب، والذي يتم عرضه على قناة الحياة.
وكشف الفيشاوي خلال اللقاء عن تفاصيل حياته الشخصية، ومسيرته الفنية، فيما يقدم “الفجر الفني” لكل متابعيه أبرز تصريحات أحمد الفيشاوي.
وقال الفيشاوي: "أنا بستخدم آلاف الأقنعة، منهم إني أكون في مكان عام ولو حد طلب مني يتصور بضطر أبتسم".
أحمد الفيشاوي:"أنا بهرب من الشرب والمخدرات بقالي 7 سنين"
وأضاف:"أنا بهرب من الشرب والمخدرات بقالي 7 سنين، وقبل كده كنت مش مهتم ومش مستوعب، ولكن دلوقتي استوعبت أن عندي 43 سنة وأني بكبر مش بصغر وأني لازم أهتم بنفسي وشغلي، وأعتقد أن الموضوع بيتحسن".
وتابع:" أنا زعلان من ناهد فريد شوقي والحي أبقى من الميت، بس هنعمل إيه الله يرحمها ويسامحها، وهي اللي كانت مزعلاني مش أنا اللي زعلتها".
أحمد الفيشاوي:" بقيت صوفي ولسه بدور على معنى الدين "
وقال: "كنت سلفي وبقيت صوفي وكنت إخواني لمدة سنتين وعمي الله يرحمه كان تكفير وهجرة، والإنسان على طول عنده تناقضات، وأنا لسة معرفش ولسه بدور على معنى الدين، وربنا رب قلوب".
أحمد الفيشاوي:" لو أنا عند دكتور نفسي هقول يارب احرق كل الناس اللي بتموت الأطفال"
وأكد:" أنا اتغيرت كتير جدًا وأنا بروح لدكتور نفسي من سنة 1997 ومغيرتهوش، وفي دكتور روحت له مرة وتاني يوم مات، تقريبًا حكيت له زيادة ومقدرش يكمل، وأنا دلوقتي معنديش مشاكل وده بعد سنين، ولو أنا عند دكتور نفسي هقول يارب احرق كل الناس اللي بتموت الأطفال والستات والعواجيز في بيوتهم".
أحمد الفيشاوي:" أنا عمري ما ندمت على تاتو عملته"
وأوضح:" عمري ما شيلت تاتو ولا هشيله، وأنا عمري ما ندمت على تاتو عملته، والتاتو ده من أيام الفراعنة وكانوا بيدقوا بخشب وقتها".
أحمد الفيشاوي:" عمر ما كانت أفلامي بتجيب إيرادات عالية"
وواصل:" الست بتبقى كاملة كمضون والشكل بييجي بعد المضمون مباشرة، وعمر ما كانت أفلامي بتجيب إيرادات عالية، وأهم حاجة إن المنتج راضي عن التجارب".
أحمد الفيشاوي:"أنا بعشق الفلوس "
واختتم :" الأستاذ العظيم فاروق الفيشاوي أبويا الله يرحمه، كان بيقولي أنت مش ملك نفسك، أنت ملك الناس، وأنا مفاتنيش أي حاجة ومولود في بوقي معلقة دهب، وأنا بعشق الفلوس".
آخر أعمال أحمد الفيشاوي
والجدير بالذكر آخر أعمال الفنان أحمد الفيشاوي فيلم السيستم، والذي حاز على إعجاب الجماهير في الوطن العربي.
