بكلمة حلوة حل مشاكلك
عندي اكتئاب فظيع من كل حاجة وخصوصا ان حياتي أصلا فيها مشاكل من النوع اللي ملوش حل .. انا سابها على الله لكن غصب عني بيجيلي لحظات بتخنق لدرجة مش قادر حتى اوصفها وانا بخاف من الدخول لي الحالة دي لان الخروج منها عادة بيبقى فيه خساير انا مش قدها .. وصلت لمرحلة بقيت فاقد المتعة بكل شيء حتى أماكن الخروج اللي زمان كنت بحبها الحاجات اللي بحب اشتريها مبقاش ليها بهجة جوايا زي الأول واصحابي بقعد معاهم لمجرد تضييع وقت او مش قادر ارجع البيت واواجه الكاري الكئيبة لواحدي .. نفسي اخرج من الحالة دي مش قادر او مش عارف وفكرت أروح لطبيب افضفض معاه شوية ورحت فعلا والموضوع فرق معايا كتيييير جداً لكني للاسف بواجه مشكلة مادية ومش قادر اواظب على زيارة العيادة ولو مرة في الأسبوع فقررت أبعت لك يا أستاذة يمكن يكون عندك فكرة او نصيحة .. متشكر جداً .. اخوكي حسن
فضفضة
محررة الصفحة .. نيفين حجازي
أستاذ حسن حضرتك ذكرت حاجة مهمة وهي تحسن حالتك بعد زيارتك للطبيب .. وهنا ما تخليش ظروف الضيقة المالية تكون عائق علشان وببساطة ممكن تحتفظ بكل النصائح اللي قالها الطبيب في ذهنك وتستمر عليها كل يوم أكيد ده هيساعدك جداً لغاية ما ربنا يفرجها ان شاء الله ، الحاجة التانية .. احرص على طرد الأفكار السلبية كل ما تلاقيها هاجمت عقلك وهاجمها بفكرة انك هتنتصر عليها وكل ما تنجح في كدة كافيء نفسك بحاجة بتحبها ولو بسيطة جداً ، هتلاقي الموضوع فرق كتير معاك .. بالإضافة إلى الابتعاد تماماً عن الشخصيات اللي بتميل إلى الكآبة او اللي بيتكلموا عن المشاكل بمناسبة ومن غير مناسبة .. بلاش تعمل أي حاجة حاسس انك مجبر عليها .. اعمل التصرفات اللي بتخلي أسرتك راضية عنك ده هيخلي الحالة المعنوية للأفضل .. حاول طول الوقت تشرح حالتك بكلمات متفائلة يعني ياريت تستغنى خالص عن كلمات الياس والزعل وعود نفسك انك ترد بكلمات بسيطة وفيها شوية امل .. يعني لو واحد صاحبك سالك أخبارك إيه ممكن تقول له كويس الحمد لله صحيح فيه شوية حاجات عطلت إنما كله هيعدي .. بدل ما تقول يعني .. نيلة زي كل يوم وغيرها من الكلمات اللي معظمنا بيستعملها في الظروف اللي زي دي .. صدقني الموضوع ده بيفرق كتير .
