د.احمد يونس يكتب: مكالمتان تضربان كل التسريبات بالجزمة
اشمعنى أنا يعنى اللى طلعت من قعر القفة! أيوه صحيح: اشمعنى أنا يعنى، دوناً عن أغلب الصحفيين، أو المستصحفين، اللى ما عندوش سيديهات لكل الناس بالصوت والصورة، أو مكالمات تليفونية بالصوت بس، أو حتى ديفيديهات سادة من غير صوت أو صورة! يا دوب بالريحة، اشمعنى أنا يعنى، دونا عن أغلب الفضائيين، أو المتفضيئين، من فضائية أو فاضى، كل واحد يفهمها بقى على مزاجه، اللى مالوش اتصالات بالأجهزة السيادية! طب أنا بقى حاوريكوا الشغل اللى على أصوله.
المكالمة دى من أيام حظر التجول فى بورسعيد.. فاكرينها؟ والتانية مفاجأة.
ألوه! أخبارك إيه يا محمد؟ إن شاء الله تكون بخير.
أهلا بيك يا مولانا: إزى فضيلته؟
باعتلك التبريكات.. باقول لك إيه يابو الأمراس: أعلن حظر التجول فى بورسعيد.
تاني؟ ماحنا جربنا الحكاية دى قبل كده ما نابناش غير التهزيئ، دول فضلوا طول الليل يغنوا لنا على السمسمية: ساعة الحظر ما تتعوضشى.
تانى وتالت وعاشر.. أنت دافع حاجة من جيبك؟ افتكر أن أنت الاستبن بتاعى، وأن إحنا صرفنا أكتر من 900 مليون دولار عشان تنجعص على الكرسى ده.. لما نقول لك امته بالظبط، خلى واحد من جوز المتحدثين الرسميين اللى بعتناهوملك مع تربة الحشيش، يطلع يعلن القرارات.
إنهين فيهم يا مولانا؟
أبو مناخير.. إياك يخضهم.. بس أعمل حسابك: الحظر المرادى بالنهار.. من 8 الصبح لغاية 10 بالليل.
هم كانوا سعروا بتاع بالليل لما حيستعنوا ببتاع النهار؟
ما هو ده المطلوب يا كروديا.. طبعا هم حيكايدونا وينزلوا يروحوا شغلهم.. ولكده نبقى دبينا سكينة مطبخ فى كرش العصيان المدنى ابن الكلب ده.
طب افرض نزلوا وما راحوش أشغالهم.. وهاتك يا مظاهرات.. ويسقط يسقط حكم المرشد.
ابقى ارجع فى كلامك وما تنساش تشكر الولاد بتوع التنظيم السرى فى المنصورة.. عاملين شغل كويس قوى.. الإسفلت أحمر.. وبعدين اصطادوا كمان اتنين تلاتة من اللى مشيوا فى جنازة المقتولين.. وغلى صوابع زينب علشان طلعت حرام.
وبلح الشام موقف مكتب الإرشاد منه إيه يا تري؟
بالموبايل من طرة لسجن برج العرب
إزاى سيادتك يا فندم؟
أنت مين ياد؟
الدكتور محمد مرسى.. إزاى مش عارفنى يا فندم؟ بأمارة ما سيادتك كنت مسمينى: البياع السريح.
افتكرت.. يكون فى معلومك: أنا عارف إزاى هربت من سجن وادى النطرون، ومين اللى هربك، ومين اللى اداك الموبايل اللى على القمر الصناعى، وكمان عارف إنك كنت محبوس بتهمة التخابر مع دولة أجنبية.
أنا طلبت سيادتك بس علشان اطمئن عليك أولاً.. وبعدين استفيد من خبرة سيادتك الطويلة.. الشعب الجبلة ده إزاى يتحكم؟
خبرة مين يابا؟ داحنا اللى بيقولوا علينا عملناه فى 30 سنة: قتل وسحل وتزوير انتخابات وسرقة وتعذيب، عملتوا انتم أكتر منه فى كام شهر، دانتوا يا جدع ما عندكوش ريحة الدم، من أول الواد المرشد لغاية الولية المجنونة اللى دايرة تقص فى شعر البنات.
أنا سيادتك حاطط ولادى جمال وعلاء فى عينى من جوة، وادى إحنا شوية شوية بنخرجهم زى الشعرة من العجين.
روح خلى نتنياهو ولا أوباما يدوك دروس خصوصية فى الإنجليزى الأول، عشان ما تضحكش علينا الناس.
إن كان على أوباما ولا نتنياهو، إحنا فى الهوى سوى يا فندم.
غور ياد أنت ما ترميش بلاك علينا.. بكره يقطعوكم حتت.
ألوه! ألوه! قفل السكة فى وشى الكافر الزنديق.. حتى أنت مش عايز تكلمنى.. لازم نأخون الراجل ده ونظامه البائد كله، ونلبس سوزان النقاب، هى ومراتات ولادها.
ملحوظة: الألفاظ الخارجة قمت بحذفها
