بعد وفاة شيرين أبو عاقلة.. رولا خرسا تستعيد ذكرياتها كمراسلة في التليفزيون المصري
بعد استشهاد الصحفية الراحلة شيرين أبو عاقلة، صباح أمس الأربعاء على يد القوات الإسرائيلية، استعادت الإعلامية رولا خرسا، ذكرياتها عندما كانت مراسلة بالتليفزيون المصري وتغطي الأحداث في فلسطين.
ونشرت رولا خرسا، منشورًا تستعيد في ذكرياتها، وذلك عبر صفحتها الشخصية على موقع التواصل الاجتماعي "فيس بوك".
وكتبت رولا خرسا: "استشهاد شيرين أبو عاقلة قلب عليّ المواجع.. قلب عليّ مخاطر عشتها زي شغلي في جنوب لبنان بعد التحرير، وغزة بعد ضربها من إسرائيل، وزي خناقاتي مع العساكر في فلسطين وصعوبة الوصول والتصوير في الجولان، زي قطار الصعيد والجثث اللي عدت جنبي".
وتابعت: "وحوار عزت حنفي بعد القبض عليه، وأحداث الكشح الطائفية ومجزرة كنيسة إسكندرية بعد العمل الإرهابي، وحاجات كتير كتير كتير، الناس فاكرة إن شغلتنا دلع وفلوس وشهرة يمكن فعلا هي كده لمذيعين كتير.. بس كده بينسوا إن اللي زيي اشتغلوا مراسلين عرضوا حياتهم للخطر".
واستطردت: "أنا أولادي لغاية النهاردة بيحاسبوني علي دا وبيقولوا لي: طب لو كان حصل لك حاجة، الناس شايفة جانب واحد بس مش شايفين البهدلة والمخاطر اللي فلوس الدنيا ما تعوضهاش".
واختتمت: "ورغم دا مقدرش أنكر أن أكتر حاجة شغلتي ادتها لي هي الحب، إني اشتغلت شغلانة بحبها مفيش يوم اشتغلت فيه مهما كان الخطر أو التعب ندمت وقلت أنا إيه اللي جابني هنا عشان كدة اكتر حاجة رجعت لي هي الحب، الحمد لله على نعمة إني عملت حاجة بحبها ممكن ناس تقضي عمرها وتكسب فلوس وشهرة ومجد بس ما تبقاش مبسوطة باللي بتعمله.. والخطر أنا اللي كنت بسعى له عشان أقدم شغل حقيقي فيه ناس حقيقيين بتجارب إنسانية مختلفة وكله بفضل الله وتوفيقه الحمد لله نعمة وافضاله كتير أو ي بس إحنا اللي بننسى".