شوية " خرابيش" مع هبة عبد العزيز
قالوا فى المدنية.. أوردر من القناة الكبيرة للإهتمام بشكل أكبر ب (الحوار الوطني) في كل البرامج حتي الرياضية … أفتكر إنه قرار جه متأخر، وكان لازم يحصل بدري عن كده!.
بس هنقول إيه: أن تأتى متأخرا خيرا من ألا تأتى.
قالوا كمان في المدنية.. سيتم إطلاق قناة إخبارية تالتة! ممممم طيب هي التانية ولا حتى الأولانية كانوا قصروا - أو طولوا - معاكم فى حاجة ياجماعة!!.
اللي حصل على السوشيال ميديا من حوالى إسبوعين تقريبا من إهتمام منقطع النظير بالرواية الهابطة لخبر أسباب طلاق حسن شاكوش من زوجته، اللى سجدت فى الفرح (عكس القبلة تقريبا) - بالصلاة عل النبى كده - يخليك عاوز تقول من قلبك بجد ( ابستك إزاى يا دنياااااااا ؟! وإنت مش بستاني!!!" لأنك لو حتى نجحت فى إنك تهرب من السوشيال ميديا، وقولت تتابع وسائل الإعلام ( المرئى والمسموع والمقروء ) هتلاقيها هى كمان يا مؤمن إهتمت بدورها تبعا وتداولت الخبر الخطر والخطير.
إحنا فعلا عايشين: عصر "بشاعة التريند" أو "هيافته" … وإختار إنت يا عزيزى اللقب الأسواء.
سمعنا في المدنية.. إن أكتر من ٩٠ ٪ من العاملين بقناة كبيرة ليها " صدى" مؤثر طالبوا بالزيادة السنوية - المتعارف عليها يعنى - زي معظم القنوات … وكان الرد عليهم: إحم إحم …بنفكر نخفض العمالة وكدهون.
الزيارة التاريخية للبابا "تواضروس" إلى روما ودولة الفاتيكان في أوائل الشهر الجاري،ولقاء المحبة بينه وبين البابا "فرنسيس" بابا الفاتيكان، بيعكس مدي تأثير وأهمية مصر الكبري في العالم.
سمعت إن الدولة بتدرس تجربة العمل " أون لاين " … والله فكرة يا جماعة! … وده تفكير منطقي يحتاج دراسة سريعة.
سؤال لكل أصدقائي وأصدقائك، ودون كذب كده: مرتبك فيه كام جرام دهب ؟!.
بعد إنضمام الدون "رونالدو" إلي الدوري السعودي الآن "ميسي" بقى على بعد خطوات.. شابوه بكل ما تحمل الكلمة من معنى لصانعي النهضة الرياضية والفنية في المملكة.
ريانة برناوي.. أول رائدة فضاء سعودية.. منذ زمن ليس ببعيد لم يكن مسموح لها أن تقود سيارة الآن تصعد للفضاء.. تحول مذهل.. المملكة عملت طفرة حقيقية وغير مسبوقة فعلا فى مجال المرأة فى فترة زمنية قصيرة جدا …بجد منبهرة وسعيدة..
سؤال: هل أصبح سعر الدولار مرتبط بالحالة المزاجية لتجار الذهب ومنتجي الحديد ومستوردي السيارات!!!؟.
سمعنا كمان وكمان في المدنية.. إن إعلامية شاطرة جدا بقالها أكتر من ٢٠ سنة بتشتغل ومجتهدة في المجال الإعلامي، تركت العمل في البرنامج الصباحي دون توضيح أيتوها أسباب، وبتقول أنها أخدت وعد بالذهاب للقناة الكبيرة..بس ماقالوش سنة كام!؟.
كلام في سرك كده.. المتحدة بتجهز شوية فلوس حلوين عشان تشتري دوري القسم التاني الموسم اللي جاي بعد قعدة الإمارات الآخيرة.
ماحدث بعد إنفصال تامر حسني عن بسمة بوسيل … الحقيقة مش قادرة أحكم عليه بشكل منطقي: هل هو رقي وتحضر؟ ولا عشق لثقافة التريند؟.
يا اختااااااى كده ينفع وكده ينفع فى العالم الإفتراضى…
الملياردير "إيلون ماسك" أعلن زواجه رسميا من "كاتانيلا" مين بقي "كاتانيلا" دي ؟ دي يا سيدى روبوت !!! اه والله زى مابيقولك كده…. الباشا بيقول إنه وقع في غرامها بعد أن صممت بالذكاء الإصطناعى لشخصية الأنثى التي يحلم بها، خبر فكرني كده بالراحل العظيم "فؤاد المهندس" لما كان بيحب "المكنة" بتاعته أكتر من "فوزية" !!
تقريبًا "غادة والي" مهكرة لاب توب وإيميلات الفنان الروسي وفضحاناه في كل حتة علشان تبقي كل اعمالها مقتبسة منه، الكوميديا في مدخلات المحامي بتاعها اللي ماشي على نغمة غادة بتتحارب!! غادة مين حضرتك ؟؟!!!
آخر حاجة قالوها بقى خد عندك يا عزيزى.. المذيعات في القناة النسائية الناعمة بيتخانقوا علي الأوت دور!!!.
طيب أشوف إعلان واحد في القناة ديه يوحد الله.. وبعدين ابقوا اتخانقوا يا بنااااااات!.