سلف ودين

السلام عليكم ورحمة الله ,

الدنيا يا استاذة نيفين سلف ودين فعلا .. انا ببعت رسالتي إنهاردة علشان تكون نصيحة لكل من له أب وأم خاصة الأم وهو غير بار بيهم .. انا طول عمري كنت عاق لأمي وتعباها جدا معايا .. في الدراسة كنت شخصية مهملة ومزعجة وفي سمعان الكلام كان آخر حاجة أعملها أني أسمع أو أطيع أمي وأحيانا كنت برفع صوتي عليها .. حتى لما كانت تتعب كنت بسيب رعايتها لأخواتي مع إني الكبيرة وطلباتها اللي جوة البيت كنت بتاقل منها وأفتكر أني كنت دايما بأتأفف .. وحاجات كتير جدا ضايقت أمي بيها .. لفت الأيام وأتجوزت وأنجبت ولد وحيد ربنا ما أردش بأكتر من كدة لان عندي ظروف صحية تمنع إنجابي أكثر من مرة .. شكرت ربنا على الولد الحيلة وقلت هوة هيبقى عوضي في الدنيا لكن بإختصار إبني كبر وابتديت أنا أعيا ولفت الأيام وحق أمي بياخدو انهاردة ابني .. ابني للأسف أدمن للهيرووين ولفيت بيه الدنيا ومفيش فايدة كل ما أدخله أحجزه في مستشفى يخف من المواد المدرة ويرجع تاني ودة معناه مصاريف تاني بقيت مش قادرة عليها وابني من الحالة اللي وصل لها ابتدا يهلوس ويدور على الفلوس بأي طريقة .. ابتدا يمد ايده على حاجتي دهب وفلوس وصوته بيعلى علية زي ماكنت بعمل مع أمي لكني النهاردة في وضع أسوأ بكتييير جدا وحسرة أمي مني ما دقتهاش إلا لما ابني دخل في المصيبة دي وبعد كل خناقة بيني وبينه أفتكر أمي اللي توفاها الله من غير ما أقدر حتى أعتذرلها .. انا عايشة جحيم لا يتصوره حد من الندم .. والله العظيم بقيت أصلي وأدعي ربنا ياخدني من كتر إحساسي بالألم من اللي عملته في أمي ربنا يرحمها .. ورغم كل دة كانت بتدعيلي لكن الجحود اللي كان عندي ومعرفش كان سببه ايه بدفع أنهاردة تمنه .. ربنا ما يكتب على حد .. انهاردة أنا مش عارفة أعيش بسبب خوفي من ربنا وخوفي ان امي تكون ماتت قبل ما تكون راضية عني .. اقسم بالله بقالي سنين شاربة مر العيشة من ابني ومش قادرة الومه لاني عارفة انه ذنب أمي ربنا يرحمها حتى أخواتي شمتانين فية وبيقولولي استاهل كل اللي بيجرالي لاني عذبتها كتير معايا .. انا باعتة رسالتي انهاردة لكل ابن وابنة بقولهم اللي عنده أم يجري يبوس التراب اللي بتمشي عليه دي دعوتها بالدنيا كلها .. اللي عنده أم يجري ورا رضاها بدون تردد ولا تبدية اي امر في الحياة عليها ولا حتى عياله .. ارجوكم تعملوا كدة قبل فوات الأوان .. مدش يقدر يتصور الجحيم اللي انا فيه دة غير اني والله اعلم ضمنت جهنم الآخرة لان فرصتي بوفاة أمي لإرضائها راحت خلاص ورحت أنا معاها .. مفيش اغلى من الأم ولا أحن منها ورضاها يسوى رضاء ربنا علينا .. بدعي ربنا يسامحني برحمته ومغفرته لكن ازاي هيسامحني على حق امي اللي عندي ؟؟ ادعولي بالمغفرة يمكن ربنا يتقبل منكم .. اما عن نفسي فأنا قررت أطلع لها عمرة يمكن ربنا يتقبلها مني وبزكي على روحها كتير يمكن ربنا يقبلها مني .. اما ابني .. فعليه العوض ومنه العوض .

مدام فاتن