لابد من جوازة تانية

انا متزوج من خمس سنين وسعيد مع زوجتي والحمد لله لكن من سنة زوجتي جالها مرض دوخت بيها على الدكاترة مش عارفين سببه ايه وكان نتيجته انها بقت عندها صعوبة في الحركة بدون اي سبب عضوي حتى النفسي وديتها لكذا دكتور ومفيش فايدة المهم جو البيت بقى غم جدا وغصب عنها طبعا لكن حياتنا اتقلبت من منتهى السعادة والحيوية الى العكس تماما دة غير انها بقت بحكم صعوبة الحركة بقت مقصرة في الواجبات المنزلية وطبعا في علاقتنا الخاصة برضه مش بقت زي الأول والصراحة انا صبرت كتير لكن في الفترة الأخيرة فاض بية وابتدى شيطاني يوزني على الجواز من ست تانية بس ضميري لطشني بالألم على وشي قالي عيب عليك تاخدها لحم وترميها عضم ؟ حتى لو الجواز مسموح برضه عيب مراتي ست ممتازة من كله واخلاقها الناس تحلف بيها هل ممكن اجرحها للدرجة دي واتجوز عليها ؟ هية دي مشكلتي .. هل استنى عليها ونشوف دكاترة تانيين لغاية ماربنا يتم شفاها ولا اقنعها ان دة حقي واتجوز ست تانية بضمير مستريح ؟ وجزاكم الله خيرا تردوا عليه في اسرع وقت .

محسن

فضفضة

محررة الصفحة .. نيفين حجازي

استاذ محسن ارى في لهجتك تأنيب ضمير أكثر من الإقبال على الزواج بأخرى .. في رأيي أن تتروى وتنتظر قليلا على شفاء زوجتك على الله ان يشفيها من عنده باذن الله واعتقد انك لا قدر الله لو في مكانها لما كانت تركتك ثانية بدون رعاية او اهتمام , صحيح انه من حقك الزواج بأخرى لكن تقول ان زوجتك سيدة ممتازة اذن تستحق منك شئ من التقدير والصبر فاصبر لعل الله يحل لكما الكثير من الخير والله الشافي .