أحمد حسن راؤول يكتب: ورقة بوسطة لـ أحمد آدم.. خسارة

افتح يابني التلفزيون هات حاجة نتفرج عليها .. هات اللي بيقولوا عليها القناة رقم واحد في مصر

 

الله.. الفنان الكوميدي الجميل أحمد آدم.. فين أيامه .. سيبه يابني نشوف برنامج بني آدم شو ده بيقول فيه إيه..

 

وبتفرج وعيني كلها فرحة بأحمد ادم اللي هشوفه بعد سنين بسمعه ف البرامج بيتكلم عن الثقافة واحترام الآخر وان قنوات الإخوان فاسدة عشان بتشتم وبيشوهوا الناس وبيكفروهم .. وبينتقد باسم يوسف بسبب سخريته من الشخصيات وان ده أسلوب غير لائق .. وان كل جمهور باسم كومبارسات وبياخدوا فلوس عشان يضحكوا ..

 

خلاص هشوف حاجة محترمة ليها هدف وقيمة وهتثقفني مثلا او هتعلمني حاجة جديدة او عالأقل هضحك باحترام ..

 

 

وربع ساعة من الضحك المتواصل المقهقه المسرسخ المسرسع -طبعا من الكومبارسات المتأجرين في البرنامج مش مني- وانا قاعد بضرب كف على كف واقول خسارتك في "التفاهة" يا آدم ..

 

بقا ده أحمد آدم المثقف المحترم اللي كان واحد من الشعب الواعي .. هي الفلوس بتغير والا صوت الطبلة شوه صورة واخلاق ومبادئ اللي كنا بنفتخر بيهم..

 

انا مش ضد النقد بالعكس .. بس اللي بتعمله ده غير انه "غير مضحك" ووصل لحد السخافة الا ان تزييفك للحقائق وتشويه الناس وقتل البشر معنويا ده اللي بقا دور جديد مش لايق عليك ..

 

يا ابن ادم .. ارجع "بني آدم"