أمير طعيمة لـ يحيي الفخراني: غلابة مين اللي مبيشتكوش إنزل الشارع هتسمع حكايات تشيب الراس

استنكر الشاعر الغنائي أمير طعيمة، تصريحات الفنان الكبير يحيي الفخراني، حول زيادة الأسعار، وأن الفقراء الحقيقيين لا يشتكون من الأسعار مطلقًا.

 

وعلق أمير على هذا على صفحته الشخصية بموقع التواصل الاجتماعي "فيسبوك"، مع التأكيد على حبه للفنان يحيي الفخراني وتقديره له.

 

وكتب أمير قائلًا : " الفنان الكبير يحي الفخراني اللي بكن له و بكن لفنه كل الإحترام و التقدير، و اللي تمللي بيجبرني اني أكون من جمهوره و معجبيه.

يا استاذ يحي غلابة مين اللي ما بيشتكوش، كون ان محيط حضرتك مفهوش غلابة يوصلك صوتهم فده مش معناه ان الغلابة ما بيشتكوش، الغلابة الحقيقيين معندهمش فيس بوك و لا بيعملوا مداخلات مع احمد موسي بس حضرتك ممكن تنزل الشارع و تتكلم مع الناس و انت تفهم ايه حالتهم و اللي وصلوله، و هتسمع حكايات تشيب شعر الراس".

 

وأضاف قائلًا: "بعدين بديهي من غير ما تنزل و تسألهم، لما الطبقة المتوسطة و فوق المتوسطة في بلد تشتكي من غلاء المعيشة فالطبيعي انك تقدر تتخيل حال محدودي الدخل و الفقراء.

الناس يتظاهروا و يخرجوا من هدومهم تهاجموهم، الناس يسكتوا و يستحملوا تقولوا مبسوطين و راضيين".

 

 

وأضاف: "الشعب ده بكم الجهل المنتشر فيه و كم التواكل و الكسل و العيوب التي لا ينكرها عاقل الا انكم مش هتلاقوا شعب زيه بيخاف علي بلده و استقرارها و ده اللي مخلي مصر واقفة رغم كم الضغوط الغير منطقية اللي علي الناس.

اللي قادر يعيش يعيش و يحمد ربنا و يسيبه بقي من الكلام علي لسان غيره، مش ضروري تحس بالناس اللي أقل منك بس علي الأقل ما تتكلمش علي لسانهم بما لا يمثلهم و لا يرضيهم، سيبهم في حالهم و لهم رب كريم".

وختم كلامه قائلًا : "ربنا عالم انا بحبك قد ايه بس ان كنا بننتقد من لا نحب فمن باب أولي نقوم بالمثل مع من نحب احتراما لأنفسنا".