يحدث فقط في مصر .. ابوتريكة وميدو والعميد والصقر وشوبير في تشكيلة الفراعنة بروسيا
حققت الكرة المصرية انجاز
كبير محصلش من 27 سنة بالتمام والكمال بالوصول لنهائيات كأس العالم في روسيا 2018 ،
الوصول للمونديال مجاش من فراغ ولا بضربة حظ دة كان وراه مجموعة ممتازة من اللاعبين
المحترفين في ليفربول وارسنال ووست بروميتش واستون فيلا وستوك سيتي وقاسم باشا وبازل
وسبورتنج براجا دة غير نجوم الاهلي والزمالك ومعاهم جهاز فني بيقوده العبقري كوبر والمخلصين
اسامة نبية واحمد ناجي ومحمود فايز وفانتا وفوق كل دة جمهور من نار قلب ملعب برج العرب
قدام غانا واوغندا والكونغو ..
فرحة المصريين بالوصول
لكأس العالم خلتهم يطلبوا حاجات غريبة عجيبة ، يعني ماقالوش مثلا عايزين رحلات مجانية
من رجال الاعمال تودينا روسيا ولا فكروا في اللعب مع منتخبات عملاقة في القاهرة عشان
يشوفوا على الطبيعة لاعبيتهم عيني عينك قدام نيمار ميسي وسواريز ، ولا قالوا عايزين
نرجع باسم مرسي وعماد متعب وشيكابالا للمنتخب ، لا دول طلبوا طلبات خاصة جدا جدا
..
اول طلبات المصريين كانت
القنبلة اللي اتفجرت على السوشيال ميديا وهي المطالبة بعودة النجم الكبير محمد ابوتريكة
من الاعتزال ومنحه الفرصة للمشاركة مع الفراعنة في المونديال ، اذاي ؟ دة ابوتريكة
اعتزل من اربع سنين واخر مشاركة له على المستطيل الاخضر كانت في ديسمبر 2013 امام اورلاندو
بيرتس في نهائي دوري الابطال !!! هو كدة يرجع يعني يرجع .. وفجأة قنبلة رجوع تريكة
تحولت لحقيقة وعملت اعلى تريند على السوشيال ميديا ..
ساحر القلوب جابها من قاصرها
وعمل تويتة شكر قال فيها " مشاعر طيبة اشكركم عليها ولكن الواقعية افضل ونحن لانسرق
مجهود الاخرين فهؤلاء الرجال يستحقون التواجد وحدهم في هذا الحدث " ..
الظاهر ان المطالبة بعودة
تريكة فتحت الباب لمحبي نجوم الكرة في مطالبة البعض بعودتهم ولو بشكل طريف انفجرت السوشيال
ميديا بأسماء لاعبين كبار مثلوا الكرة المصرية ودافعوا عنها في كل المحافل القارية
والدولية .. خد عندك بقى ياسيدي .. الاعلامي الكبير عمرو اديب قال طالما تريكة هايرجع
يبقى لازم نرجع احمد شوبير ومعاه ميدو .. وبيني وبينك اهو احمد شوبير لعب قدام فراودة
كبار زي خوليت وماركو فان باستن وعنده خبرة اللعب المونديالي .. ومع ازمة المهاجمين
في الكرة المصرية ممكن نعمل برنامج تأهيلي لميدو ويرجع احسن ما كان في اياكس ومارسيليا
والمستشار مرتضي يقيده ستة شهور في الزمالك ويلعب مع نيبوشا ويكسر الدنيا ..
محبي النجم احمد حسن قالوا
الصقر كان نفسه يلعب كأس عالم وعمل كل حاجة مع الفراعنة اية المشكلة يدخل هو كمان التشكيلة
وكله بيجي بالتاهيل ياعم دة ميلا بتاع الكاميرون لعب وهو عنده 44 سنة وباولو روسي بتاع
ايطاليا طلع من السجن عشان يلعب مع ايطاليا ..
وخد عندك بقى اللي اقترح
وائل جمعة واللي فكر في سيد معوض .. وانا بالنسبالي شايف ان افضل اربع لاعيبة ممكن
يكونوا اضافة لمصر في المونديال حسام حسن ومجدي عبد الغني واحمد الكاس وطارق يحيي
..
