بعد تصدرها التريند.. تعرف على أبرز تصريحات الفنانة شهيرة في برنامج "كلام الناس"
تصدر اسم الفنانه شهيرة مؤشرات البحث "جوجل"، وذلك عقب حلقتها مع الاعلامية ياسمين عز فى برنامج "كلام الناس" على قناة ام بي سي مصر، والتي تحدثت خلالها عن علاقتها بالفنان الراحل محمود ياسين، وعن تفاصيل مرضه وحالتها النفسية وعن امكانية العودة للتمثيل مرة أخرى، وفي السطور التالية يعرض لكم "الفجر الفني" أبرز تصريحات الفنانة شهيرة خلال حلقتها في برنامج "كلام الناس".
شهيرة: الفنانات دلوقتي شبه بعض بسبب عمليات التجميل
وجاوبت الفنانة شهير على سؤال الإعلامية ياسمين عن الفارق بين جيلها والجيل الحالي من الفنانات، لترد شهيرة قائلة: "البنات دلوقتي كلهم شبه بعض، لكن على أيامنا مكناش شبه حد، وكان لكل واحدة فينا اللمسة بتاعتها الخاصة بيها، ومكانش في الفيلر والبوتوكس وكانت كل حاجة طبيعية، ياريت كان في على أيامنا كده، كنت أقولهم خلوني شبه مارلين مونرو، لكن بردو في نجمات من جيل تاني ليهم جمالهم الخاص الملفت، زي منة شلبي جمالها بسيط وجبارة في التمثيل".
شهيرة تكشف سبب اعتزالها الفن
وكشفت الفنانة شهيرة عن السبب الأساسي لإعتزالها الفن والتمثيل، قائلة: "اعتزلت الفن؛ لإنه شغلني عن ربنا والصلاة، ولاحظت إني كنت بصلي بسرعة عشان ألحق التصوير وقولت لازم أختار وأبعد عن التمثيل اللي هو هوايتي وشغلي الوحيد لإني خريجة معهد تمثيل، وبقيت أقضي وقتي في قراءة القرآن والأحاديث ومناجاة الله، وبكلمه من قلبي باللغة العامية ودون تكلف لإنه أنيسي وونيسي وجليسي، ومحمود ياسين مطلبش مني أعتزل بالعكس هو مكنش يعرف واتفاجئ بقراري".
شهيرة تصف معاناتها بعد وفاة زوجها محمود ياسين
ووصفت الفنانة شهيرة حالتها بعد وفاة زوجها الفنان محمود ياسين مؤكدة أنها لا تستطيع أن تتجاوز حزنها عليها وتشعر أنها محطمة، فقالت: "مش قادرة أتجاوز وفاة محمود ياسين لحد دلوقتي، مش عارفة طبعًا بحاول على صفحتي كل الفانز بيقولوا لنا وحشتنينا، لكن في الحقيقة محمود ما يتعوضش كزوج وإنسان مفتقدة حاجة كبيرة أوي في حياتي أنا مش مظبوطة ومحطمة".
وتابعت حديثها: " جيت النهاردة عاوزة أخرج من الحالة اللي أنا فيها كل صحابي بيقولوا لي لازم تخرجي من الحالة وإني واحشة الناس، ولازم أبقى قوية شوية لإني ساعات بكون محطمة، وولادي عوضوني شوية، وبيهتموا بيا وبيحاولوا يطلعوني ويقولوا لي ما ينفعش تبقي قافلة على نفسك، لإن الحزن الزايد عن اللزوم بيأثر عضويًا وصحيًا ومحمود كان إنسان رائع وراقي وكان متفرد".
هل ستعود شهيرة إلى عالم التمثيل من جديد؟
وتحدثت الفنانة شهيرة عن إمكانية عودتها من جديد للساحة الفنية بعد غياب دام لسنوات طويلة، موضحة: "بكون متحمسة جدًا وقتها، ولكن لما بفكر وأقول طب والورق، أهم حاجة الورق لإني بقالي فترة طويلة أوي مطلتش على الناس بأي دراما، فبعد السنين دي كلها الواحد بيبقى قلقان، ومش عارف بعد السنين الطويلة دي هيقدم إيه للجمهور، هل هقدم حاجة يقولوا لي لأ يا ريتك ما عملتيها ما انتي كنتي قاعدة وإحنا حابينك كده".
