طلعت زكريا: انا مع مبارك قلبا وقالبا

ما زال طلعت زكريا يعاني من هجومم ثوار التحرير ضده. لقد فشل فيلمه الفيل في المنديل ولم يحقق إيرادات تذكر، ولم يرفع اسمه من القوائم السوداء وهو ما زال يتعرض لانتقادات عنيفة على الفيس بوك من الشباب الذين يطالبون بإبعاده.

ماذا سيقول طلعت زكريا عن هذا وما موقفه المقبل من الفن.

بداية ما آخر أخبارك الفنية؟

- أشارك في رمضان كضيف في اكثر من برنامج وعندي مسلسل 'الشاويش عطية' ولكنه تأجل بسبب الظروف التي تمر بها البلد.

ما رأيك في الظروف التي تمر بها البلد؟

** البلد دلوقتي فيها فوضى لما نوجه اتهامات لوزراء يطلعوا أبرياء نوجه اتهامات للمجلس العسكري أو الثوار يطلعوا ابرياء مين اللي بيعبث في البلد ده احنا مش عارفين في حد مش عايز استقرار لهذه البلد هو مين؟ الأيام اللي جاية هتعرفنا واللي بيحصل دلوقتي مش من أخلاص المصريين.

أنا شايف ان في يد خفية بتعبث لا يوجد فلول النظام السابق ولا الرئيس السابق لأن فلول النظام موجودين في السجن والرئيس ايضا مرمي في المستشفى.

ما رأيك في القائمة السوداء وأنك من أوائل الأسماء على رأس القائمة؟

** أنا مستعجب من القائمة السوداء التي تتنافى مع الحرية والديمقراطية وبعدين مين اصلا اللي عمل القائمة السوداء ده أنا لما بقابل حد من شباب الثورة بيقولوا انهم معملوهاش، المجلس العسكري معملهاش امال مين اللي عملها هنبدأ نشك في بعضنا أنا بتساءل مين اللي عمل هذه القوائم السوداء؟ أنا اعتقد انهم فنانين اللي نزلوا ميدان التحرير هما اللي عملوا القوائم السوداء لفنانين اللي قالوا تصريح خطأ عن الثورة.

*ما رأيك في اعتصامات الجمعة وتصريح بعض الفنانين في المشاركة فيها؟

** أنا شايف ان موضوع المظاهرات والاعتصامات في ميدان التحرير دمه هيتقل ولما دمها هيتقل كل المصريين هينقلبوا عليها لأن الناس محتاجة استقرار هما كده بيعطلونا علشان كلام فارغ الدستور الأول ولا الانتخابات الأول كل ده لا يستدعي اعتصامات ومظاهرات.

ما الأولوية من وجهة نظرك الدستور أم الانتخابات؟؟

** أنا عاوز استقرار البلد زي ما كان بلاش بقا يطلع لنا 30 حزبا و40 ائتلافاً واتضح ان معظم الائتلافات دي كانت بتمول من الخارج وهذا الكلام مكتوب في الجرائد ان حركة 6 أبريل لها تمويلات أجنبية.

هل تصريحاتك عن الثوار واتهاماتك لهم اثرت على إيرادات الفيلم؟؟

** انا معرفض ايرادات الفيلم لحد دلوقتي ولا انا مستني ايرادات الفيلم ولا انا خايف على جماهيريتي لو مشتغلتش ممثل هشتغل أي حاجة تانية ده رزق من عند ربنا ومحدش يقدر يمنع رزقي هما متخيلين انهم هيقطعوا رزقي وان لو الفيلم سقط انا مش هشتغل تاني بس انا هشتغل وهعيش في بلدي زي أي مواطن مصري حتى لو هشتغل سواق تاكسي.

لكن تصريحاتك اثرت على جماهيريتك وخصوصا انها كانت مستفزة للجمهور؟

** أنا تصريحاتي مش هغيرها سواء تجاه الرئيس السابق أو تجاه المتظاهرين وأنا فعلا قلت ان فيه ممارسات سيئة تحدث في ميدان التحرير اثناء الثورة من خلال فئة من الجمهور وأنا نزلت ميدان التحرير وشوفت بعيني هخاف من ايه لكن نزلت متنكر لأن تامر حسني كان قبلي بيوم وانضرب من المتظاهرين شوفت على أطراف الميدان اللي نازل هو وصاحبته يفسحها واللي بيشرب مخدرات لكن شباب الثورة الحقيقيين عملوا الثورة يوم 25 و26 ومشيوا بعد كده اتخرب ميدان التحرير اصبح متنزه للفرجة والفسحة خصوصا ان كان في نصف السنة ومفيش أماكن يتنزهوا فيها.

قيل انك اعتذرت لشباب الثورة في مؤتمر صحفي في الكويت؟

** أنا معتذرتش ولا هعتذر لحد لأني متهمتش شباب الثوار انا اتهمت الشباب القليلة اللي كانوا موجودين في الميدان.

بالنسبة لكلامك عن الرئيس السابق حسني مبارك؟

** أنا مش عارف هما حطتني في القائمة السوداء ليه أنا اتكلمت عن مبارك الانسان ومليش دعوة بمبارك الحاكم حتى لو هو اللي قتل المتظاهرين بنفسه أو هو اللي خرب البلد هو عمل حاجة حلوة معايا وأنا بعترف بيها وأنا بعترف اني بحب مبارك أنا بحبه أنا مع مبارك قلبا وقالبا.

لقاءك الذي تم مع الرئيس السابق حسني مبارك قبل الثورة ما الذي دار في الحوار بينكم وما انطباعتك عنه كرئيس في هذا الوقت؟

** أنا تقابلت مع الرئيس لمدة 2ز30 تحدثنا عن الفن وأحوال البلد وشعرت اني قاعد مع أبويا، عمي حد قريب ليا رجل طيب جدا وأنسان مخلص للبلد والدليل على هذا انه قال انا مش هسيب البلد ده وهموت فيها احنا بنتهموا بكل حاجة النهاردة بقى مبارك هو اللي قتل سوزان تميم وسعاد حسني هو كان مغيب بقالوا سنين وباقي النظام كان بيخرب فيها وهو لا يدري وكل الناس اللي بتهتف بإعدام مبارك دول كانوا فين من 30 سنة لسه فايقين دلوقتي ايه النازية اللي بقينا فيها ده احنا لازم نستنى عليه شوية ويجب العفو عند المقدرة.

انت قولت ان فيلم طباخ الريس يحتوي على معظم مطالب الثورة هل انت شايف ان مطالب الثورة وأهدافها اتحققت؟؟

** لا متحققش منها حاجة ولا هيتحقق لأن مطالب الثورة موجودة اصلا الحرية موجودة والديمقراطية موجودة والعدالة الاجتماعية النهاردة الحالة الاجتماعية لأي مواطن مصري أقل بكثير من ما كانت عليه قبل الثورة النتائج التي حققتها الثورة انها بعدت نظام بأكمله مين بقى اللي جاي أي مرشح آخر سوف يحقق الأمن والاستقرار تاني هو يعرف ان أي خطأ يحدث هينزل الشعب ميدان التحرير.

أيه كان في عهد النظام السابق فقر وناص كانت بتاكل الزبالة لكن عمر ما حد مات من الجوع في مصر.

الشعب المصري عاوز يجيلوا فلوس من غير شغل احنا بنحب كده عاوز بعد الثورة الى عملها ده بأسبوع يبقى معاه فلوس من غير ما يشتغل طب إزاي لسه نتائج الثورة ده هتبان بعد وقت طويل مش أقل من 7 سنين.

ما رأيك في الفنانين اللي صرحوا انهم نازلين الميدان كل جمعة؟؟

** ينزلوا كل واحد يعبر عن رأيه لكن المفروض احنا نهدي الشعب مض نزوده كفانا بقى كل واحد صرح وعبر عن اللي جواه وحان وقت العمل إلا بقى لو يرجعلنا مبارك تاني وده من رابع المستحيلات لأن كل الناس دلوقتي عايزين يستقروا ومبارك هو اللي كان محقق هذا الاستقرار.

مش بتفكر تعمل حاجة عن الثورة؟

** أنا والله بفكر بس خايف اتفهم غلط ولو عملت هعمل عن الجانب الكوميدي فلي الثورة زي البائعين واللافتات اللي كانت بتترفع في الميدان.

أخيرا تحب تقول ايه لجمهورك؟

** هقوله كلمة واحدة اللي بيحب طلعت زكريا يدخله الفيلم لأن يجب نبعد آراء الفنان السياسية عن أعماله الفنية واللي بيحب طلعت زكريا يدخل الفيلم واللي أخد موقف براحته.