محمود الليثي: سيدة دعت لي وماتت قبل نجاح "سطلانة" بأيام وربنا استجاب لها

حل صناع أغنية سطلانة ضيوفا على برنامج صاحبة السعادة الذي تقدمه الفنانة والاعلامية " إسعاد يونس"، المذاع عبر قناة dmc، كشفوا كواليس الأغنية وفكرتها، وذلك بعد أن أثارت جدلًا عبر مواقع التواصل الاجتماعي بشكل كبير.

الليثي يروي موقفًا مع سيدة قبل نجاح "سطلانة"

أعرب الفنان محمود الليثي عن سعادته البالغة، بعد نجاح أغنية سطلانة، وروى موقفًا مع سيدة قبل نجاح الأغنية ونسب لها هذا النجاح، قائلًا: "أنا ومدير أعمالى شفنا واحدة غلبانة وتعبانة ومعندهاش حد يوديها المستشفى، واتبرعنا وودناها المستشفى كان يوم الأربعاء، يوم الخميس خرجت ودعيت لينا، وقالت الدعوة دى من حقكوا عشان انتوا بتراضوا اللى زينا، ومشيت 10 خطوات ووقعت ماتت، ووعدنا نفسنا قدام ربنا إن عيالها في رقبتى أنا ومدير أعمالى ليوم الدين".

الليثي: ربنا بيسبب الأسباب

وأضاف الليثى: "يوم الجمعة كان مباراة الأهلي والوداد ومش في دماغنا حاجة، وكنا زعلانين على الست اللى ماتت، وكان يوم السبت الأغنية مكسرة الدنيا في كل مكان، فهو ربنا بيسبب الأسباب واللى يقدر يعمل خير يعمله عشان هيقعد له".

الليثي: الاجانب بيغنوا سطلانه

وروى محمود الليثي موقفًا آخر، قائلًا: كنت في شرم الشيخ من فترة لإحياء حفلة هناك، وفي ناس كتيرة أجانب من روسيا وأوكرانيا وفرنسا بيطلبوا يتصوروا معايا، قولتلهم يا جماعة أنتو تعرفوني، لاقتهم بيقولوا أوووه سطلانة، متوقعتش إن الأغنية توصل للناس دي.

صناع سطلانه: هنغني في فرح طاهر محمد طاهر ببلاش

وخلال اللقاء قال محمود الليثي: إحنا الأربعة هنغني لطاهر محمد طاهر ببلاش علشان وشه حلو علينا، والأهلي كسب الوداد، النادي الأهلي الكبير بتاعنا، الماتش خلص، اللاعيبة خرجت من الماتش وراح أوضة اللبس وشغلوا سطلانة بالحظ، إحنا نمنا يوم الماتش، صحينا لقينا الأغنية تريند، وإحنا كسرنا المريخ.

أغنية سطلانة

ويذكر ان أغنية سطلانة قد تصدرت محركات البحث خلال الفترة الماضية، بعدما تصدرت احتفالات الأهلي بعد الفوز بدوري أبطال إفريقيا وظهور اللاعبين وهم يرددونها عقب الفوز أمام الوداد، كما وصلت مشاهدات الأغنية إلى أكثر من 7 ملايين مشاهدة على يوتيوب، وهي من كلمات مصطفى حسن، وتوزيع أماديو، وألحان كريم عاشور، وتعد سطلانة الأغنية الدعائية لفيلم بعد الشر، الذي طرح في موسم أفلام عيد الفطر 2023، وهو من بطولة الفنان علي ربيع، وعدد من الفنانين، أبرزهم الفنانة ميرنا نور الدين، ملك قورة، رنا رئيس، أوس أوس، عمرو عبد الجليل، بيومي فؤاد، شيرين، هالة  خليل، سليمان عيد، وآخرين، وهو من إخراج أحمد عبد الوهاب.

كلمات اغنيه سطلانه

دكتور شوف لي تصريفة أبوس إيديك إكتب لي روشتة
أنا جوايا حتة نظيفة خذها ارميها في أي حتة
نفسي أقطعها نفسي أقلعها زي ما بقلع الجاكتة
وجيت أبيع حب ماحدش نفعني قفلت الدكانة
أووه سطلانة، سطلانة، لانة سطلانة
أووه سطلانة، سطلانة، لانة سطلانة
كنكة بن تفوقفني ما فوقتش
رشة ميّه تفتحني ما فتحتش
راكب دماغي ودايس ومزاجي في الطالع خالص
أسرع من صواريخ ناسا الواحد ياما قاسى
هبعد بعيد لأتعدي من الناس العيانة
أووه سطلانة، سطلانة، لانة سطلانة
أووه سطلانة، سطلانة، لانة سطلانة
والنبي تديني يا شيف حبة دلع في رغيف
علشان أشبع من الفرحة وأوفر المصاريف
والنبي تديني يا شيف حبة دلع في رغيف
علشان أشبع من الفرحة وأوفر المصاريف
عمالة الدنيا تلف، تلف ومرقصانا
أووه سطلانة، سطلانة، لانة سطلانة
أووه سطلانة، سطلانة، لانة سطلانة
كنكة بن تفوقفني ما فوقتش
رشة ميّه تفتحني ما فتحتش
راكب دماغي ودايس ومزاجي في الطالع خالص
أسرع من صواريخ ناسا الواحد ياما قاسي
هبعد بعيد لأتعدي من الناس العيانة
أووه سطلانة، سطلانة، لانة سطلانة
يا نفسي خليكي في نفسك يا إما حتبقي الغلطانة
ويا إحساساتي حفضل حابسك أحسن تجري ع اللي أذانا
خذت العلاجات وما خفتشي أعصابي تلفانة
أووه سطلانة، سطلانة، لانة سطلانة
يا بنت يا حب الحب يا قلب القلب يا نن العين
بحبك أكثر من الفاكهة ومن شنطة فيها ملايين
نفسي أشوفك لدلق عليكي وعليّ شوية بنزين
أصل أنا مجنون في حبك ودماغي تعبانة
أووه سطلانة، سطلانة، لانة سطلانة
أووه سطلانة، سطلانة، لانة سطلانة
من الناس العيانة