تامر أمين يفتح النار على اتحاد الكرة: "الدولار اللي تحتاجه البلد يحرم على فيتوريا"
علق الإعلامي تامر أمين، على خروج المنتخب الوطني بعد الخسارة بضربات الترجيح أمام منتخب الكونغو والخروج من دور الـ16 لبطولة كأس أمم إفريقيا المقامة حاليًا في كوت ديفوار.
لا خطة ولا روح ولا أداء
وقال "أمين" خلال تقديم برنامجه "آخر النهار" المذاع على فضائية "النهار" مساء اليوم الإثنين، "الواحد مش عايز يقول حاجة أكيد فيكم قد اللي فيا والنكد مسيطر علينا من امبارح، في أسوأ كوابيسنا مكناش نحلم نخرج خروج من الباب الصغير".
وأضاف "ده الخروج المذل بكسرة وخيبة وعدم شعور بقيمة التيشيرت ولا اللي موجودين ولا اللي مصابين اللي سافروا لا روح ولا خطة ولا أداء، العار الكامل اننا مقبلناش فكرة كرة لا قابلت الكاميرون ولا السنغال ولا المغرب المفروض الأربع ماتشات يتحولوا إلى نزهة".
تامر أمين يفتح النار على اتحاد الكرة
وتابع "منتخب الكونغو يعمل علينا امبارح حفلة وكان ممكن يخلص هوديكو ضربات الجزاء ولا الهوا الله يمسيك بالخير يا حضري، ايه يا أبو جبل كله يمين وهل الإعلان عن انتقال أبو جبل للنادي الأهلي أُثرت عليه ده أنت كنت سايب لهم الجون لا فيه إدارة ولا أي حاجة".
وفتح الإعلامي تامر أمين النار على اتحاد الكرة، مستطردًا "البطولة خلصت هو أنتوا قاعدين ليه ما تقوموا تروحوا واتفضلوا من غير مطرود واوعوا تقولوا فيتوريا جاي علشان كأس العالم، فيتوريا اللي بيقبض 200 ألف دولار شهريًا وأنا بقول الدولار اللي تحتاجه البلد يحرم على فيتوريا مش من دمنا وأعصابنا ونشوف حرقة الدم وعليكم أن تعتذروا ووشكم في الأرض".
