علي عبدالرحمن يكتب: هنبطل هري امتي؟!

عزيزي قارئ السطور لا تستعجب من عنوان المقال فكلنا هرايين، وعلي رأي إحدى صديقاتي (الهري والزيطة أصبح أسلوب حياة)، فأسمح لي أن أهري معاك بعض الوقت؛ لعل وعسي نقدر نبطل هري وده في المشمش طبعًا، فكلنا نهري وكل حدث له من الهري ما يستحقه، سنرصد للهرايين أنواع الهري في جميع المجالات.

 

الهري السياسي؛ فحدث ولا حرج بسبب كم الهري خاصة ممن يطلقون على أنفسهم النخبة السياسية، والفتي فيما لا يعينهم ولا مجال تخصصهم، فمثلا الشيخ يناقش مشاكل المسحيين والكاتب يناقش مشاكل اللاعبين والإعلامي بيهري علشان الإعلانات ويزعم أنه الأعلي مشاهدة ويتحفنا بيانات صحفية قبل وبعد الحلقة، والردح الإعلامي وكله يامعلم مقضيها علشان السبوبة تحكم.

 

أما عن الهري الكبير فهو التصيد لكل خطابات الرئيس وكلماته التعبيرية، وأن كان هذا غير موفق من قبل شخص رئيس الجمهورية في الخروج عن الإطار المحدد له في الخطابات الرسمية.

 

أما القطاع الأكبر الذي يتمتع بشعبية كبيرة في الهري والزيطة هو الفن والرياضة، من مدح وذم وخناقات ومن اعلي أجرا ومن أشهر ومن له متابعين أكثر على مواقع التواصل الاجتماعي يدافع عنه ويحمد فيه، وخناقة فلان وعلان علي مين اسمه قبل التاني وشوف جواز فلان وطلاق فلانة، شوفت حسن وهوا بيحب ايمي ازي؟ والا فرحة عمرو يوسف وهو بيتجوز كندة بالرغم من فرق السن بينهم وكمان عندها طفلة يا صلاة الزين!

 

ندخل بقي علي هري قطاع الاتصالات ورسائل الواتس أب إرسالها لـ 10 وان لم تفعل فان الشيطان قد منعك، وأنت حلفت لتبعتها لكل أصحابك ورسائل تهنئة شبيه أسامة منير بالمولد النبوي وطبعا ده يدخلنا في هري الوحدة الوطنية وأننا أيد واحدة -مش فاهم ليه بالرغم ان لكل بني ادم ليه أيدين.

 

وهري الأصحاب بقي، ده خاني وجارحني واللي عملت اشتراك في الجيم ونفسها تعمل دايت علشان تبقي شبة نجوم هوليوود وهي أصلا اخرها تتصور سيلفي قدام مراية حمام الجيم، وابقي قابلني لو خست، واللي تقولك أنا بشعر بالسعادة لأنها كلت تشيز كيك -(نعم مش فاهم)- وواحد بقي حب يروش يقولها كان نفسي أكون صوص الشيكولاتة يسيل عبر فمك.

 

أما عن الجماعة الصحفية والإعلامية فدول بقي ملوك الهري والزيطة فى كلام فاضي بعيد عنك ولازم نعمل من الحبة قبه اومال أزاي هنقفل الـ120 خبر يوميًا وعدد ساعات الهوا اللي مفتوحة بسبب الإعلانات ولا عزاء للقارئ والمشاهد علي هرينا.

 

عزيزي الهراي تعالي نلتزم قواعد الهري والزيطة الصحيحة أن الموضوعات اللي هنسف ونقلش عليها يكون لمدة يوم واحد حتي نستمتع بالهري والزيطة كما يجب أن تكون.